Nun restaurante futurista de Shanghái, un pequeno robot avanza ata a mesa, levanta a tapa de plexiglás mostrando un prato de cangrexos e di con voz mecánica: «¡Bo proveito!». Aquí os autómatas substituíron aos camareiros.
28 ago 2018 . Actualizado ás 18:12 h.Trátase dun proxecto do Alibaba, o xigante chinés do comercio por Internet, para modernizar os servizos en China , un país onde a intelixencia artificial e a robótica están cada vez máis integradas no comercio. A compaña quere aumentar a eficacia do servizo e reducir os custos laborais na súa cadea de restaurantes Robot.Hei, onde robots do tamaño dun microondas rodan para levar os pratos aos clientes. «En Shanghái, un camareiro custa ata 10.000 yuans mensuais [1.250 euros, 1.460 dólares]. Isto supón centos de miles de yuans ao ano. E necesítanse dous equipos de camareiros», explica Cao Haitao, xefe de produto en Alibaba, que ideou o robot-camareiro. «En cambio non se necesitan dous equipos de robots e están operativos cada día», asegura. Os restaurantes Robot.Hei dependen da cadea de supermercados semiautomatizados Hema, onde os clientes enchen as súas cestas cunha aplicación móbil e reciben as súas compras en caixa grazas a unha cinta transportadora ou directamente nas súas casas. Os 57 supermercados Hema repartidos en 13 cidades chinesas terán todos no futuro o seu restaurante Robot.Hei.
Segundo os expertos, o concepto é sobre todo un xeito de presentar unha nova tecnoloxía e non tanto un novo modelo de negocio, nun país onde o custo do traballo é bastante débil. Os restaurantes son tamén un símbolo do uso desmesurado das novas tecnoloxías en China , decidida en converterse en líder da intelixencia artificial. Os pagamentos con teléfono móbil son moi frecuentes e sectores enteiros do comercio de proximidade, desde farmacias ata librerías, deixaron de ter caixas. O gran rival de Alibaba, JD.com, tamén ten previsto abrir antes de 2020 miles restaurantes con pratos preparados e servidos por robots. E do mesmo xeito que Amazon nos Estados Unidos, JD.com e outras empresas chinesas exponse entregar pedidos con drones. Todas esas innovacións poderían permitir limitar os custos nun momento no que o comercio en liña empeza a estancarse en China , tras anos de forte crecemento.
«Antes, todo o mundo buscaba unha expansión rápida. Pero o crecemento rematou, e todo o mundo se centra en mellorar o seu funcionamento», di Jason Ding, experto do comercio chinés en Bain & Company. «Trátase de reducir os custos e mellorar o servizo. Esas tecnoloxías que recorren a máquinas automatizadas, ben utilizadas, poden contribuír a iso», considera.