O millo é un alimento nutritivo e moi versátil á hora de cociñar. Ensinámosche trucos para aforrar traballo ao momento de preparalo
14 jun 2023 . Actualizado á 16:53 h.
O millo é un dos alimentos máis consumidos ao redor do mundo. Este vexetal non contén glute, así que é perfecto para celíacos e intolerantes. Achega bastante enerxía, uns 100 gramos de millo cocido conteñen aproximadamente 109 calorías. Ademais, varios estudos demostraron que o millo cocido é fonte de antioxidantes e por ser baixo en sal axuda no control da presión arterial.
Pero se á hora de cociñalo non sabes como pelalo para aproveitar ao máximo os seus grans, en Sabe Ben che ensinamos algúns trucos para aforrar traballo á hora preparalo.
Quitar as follas da mazorca
Se non queres complicarte, podes comprar no supermercado o millo xa pelado, ou enlatado, suxerímosche a mazorca natural, polo seu rico sabor. O proceso de quitar as follas parece lioso, pero en realidade é moi sinxelo.
O primeiro truco para sacar as follas é pór o millo por trinta segundos no microondas. Despois cortaremos cun coitelo afiado a punta de abaixo, a parte da raíz, preto de 2 cm. Así o millo sairá facilmente da folla e sen ningún pelo.
Se non tes microondas, podes facer o noso segundo truco: cun coitelo curta de forma horizontal 2 centímetros as dúas puntas do millo con follas. Daquela fai outro corte no sentido oposto ao que fixera (verticalmente de punta a punta). Agora, dunha soa vez, saca as follas con facilidade.
Pelar o millo
Existen produtos específicos para pelar o millo e poder sacar os grans enteiros, podes atopalos na internet ou en calquera tenda de utensilios do fogar. Se non tes ningún destes aparellos cun coitelo será suficiente.
Para iso colleremos un trapo que estenderemos sobre unha superficie firme, coloca o millo de forma vertical sobre o trapo e co extremo máis fino da mazorca apoiado sobre a superficie iremos cortando de arriba cara abaixo os grans.
Preservar o millo
No caso de ter moito millo pódelo conxelar, desta forma non se estraga nin perde nutrientes. Para iso a mellor opción é cociñalo previamente mediante vapor, así se manterán os grans ben hidratados. Despois deixa arrefriar e colócaos en bolsas con peche hermético, así se conservarán no conxelador durante todo o ano. Tamén podes cortar e conxelar o millo cru.