A muller do actor de Hollywood, Betsy Arakawa, morreu unha semana antes causa de hantavirus, que se contrae por exposición a excrementos destes animais
16 abr 2025 . Actualizado á 07:34 h.O Departamento de Saúde de Novo México (EE.UU.) atopou múltiples roedores mortos en varias dependencias da vivenda na que faleceron o actor Gene Hackman e a súa esposa Betsy Arakawa, esta última a causa de hantavirus, que se contrae por exposición a excrementos destes animais.
Segundo recollen os medios estadounidenses, que citan un informe ambiental deste departamento realizado en marzo, atopáronse cadáveres e niños de roedores en tres garaxes, así como en dúas «casiñas» -pequenas vivendas que están separadas da propiedade- e en tres alpendres. Ademais, nun dos garaxes había un roedor vivo, de acordo con CNN.
As autoridades tamén avistaron roedores mortos, un niño e feces en dous vehículos que se atopaban na propiedade, catalogados no informe como «maquinaria agrícola» ou como transportes «abandonados».
Arakawa e Hackman, que contraeron matrimonio en 1991, foron atopados mortos na súa illada casa nos arredores de Santa Fe en febreiro pasado. O médico forense estatal concluíu que Arakawa, de 65 anos, faleceu a causa de hantavirus, que pode causar síntomas parecidos aos da gripe antes de progresar como unha enfermidade respiratoria, así como insuficiencia cardíaca e pulmonar.
Pola súa banda, Hackman, quen padecía Alzheimer, pasou unha semana máis na casa convivindo co cadáver da súa esposa antes de falecer o 18 de febreiro por unha enfermidade cardíaca.
O actor, lenda de Hollywood durante varias décadas do século XX, gañou dous premios Óscar polos seus icónicos personaxes en The French Connection e Unforgiven, e converteuse nun dos intérpretes máis versátiles e populares da súa xeración.