Un intruso achanda a mansión do cantante Justin Bieber e a súa muller en Los Ángeles
SOCIEDADE
O cantante estaba de vacacións coa súa esposa, Hailey Baldwin
19 sep 2022 . Actualizado á 18:34 h.Un intruso entrou na exclusiva mansión de Los Ángeles do cantante Justin Bieber e da súa esposa Hailey Baldwin mentres eles estaban de vacacións. O servizo de seguridade decatouse de que había alguén pasando o intre xunto á grellada e deu o aviso á policía que non puido facer nada xa que o suxeito fuxiu saltando o muro e desaparecendo a pé pola veciñanza.
A seguridade do cantante explicou que vira a unha persoa no patio traseiro da vivenda onda a grellada e cando se achegaron ao home, botou a correr, saltou un dos muros do xardín e vagueou polo barrio de modo que o perderon de vista.
Non é a primeira vez que o cantante canadense ve como un estraño achanda o seu fogar. No 2012, tres ladróns foron detidos por entrar na súa mansión de Texas para subtraer obxectos de valor e recordos da estrela do pop. Máis curioso foi o que pasou uns anos despois, no 2015. Dúas nenas de doce anos non atoparon mellor modo de festexar o aniversario dunha delas que coándose na casa do artista mentres el estaba dentro gozando con amigos na piscina. Ao tratarse de dous adolescentes, Justin non dubidou en reprendelas e en reterlles os seus teléfonos móbiles. Naquela ocasión, o cantante deixounas marchar sen presentar cargos.
A noticia da nova invasión da súa intimidade chega cando o artista, de 28 anos, anunciou a súa retirada dos escenarios debido á parálise facial parcial que sofre, provocada por un virus. Era el mesmo o que informaba os seus seguidores da súa situación a través das súas redes sociais nas que publicaba imaxes onde podían apreciarse os problemas de mobilidade no seu rostro.
