Abanca obtén un beneficio de 427 millóns no primeiro semestre e suma 76.000 novos clientes

Abanca pechou o primeiro semestre do 2025 cun beneficio de 427,1 millóns de euros, o que supón un 3,7% máis respecto ao ano anterior. O volume de negocio acadou os 134.000 millóns, e todos os indicadores experimentan crecementos moi valorados pola entidade nun contexto de baixadas dos tipos de interese. Nese mesmo período atraeu a 76.000 novos clientes (un 12% máis respecto aos seis meses anteriores) e situou a súa rendibilidade nun 14,6%; o crédito, focalizado en familias e empresas, creceu un 16%, ata os 9.000 millóns de euros; os depósitos, tamén medraron un 16%; e o negocio dos seguros, un 18%, cunha curva positiva moi pronunciada no caso dos decesos. Dobres díxitos «que demostran o forte dinamismo da entidade», que presentou este luns as súas contas do ecuador do exercicio en Santiago.

O trazo groso do balance describe un banco de «gran solidez», cun perfil de liquidez «estable», con «robustos niveis de capitalización», que aumenta a calidade do risco con taxas de moura en niveis baixos (2,3%) e que vai cumprindo os obxectivos marcados con anticipación, cunha folgura de 1.962 millóns sobre os requisitos regulatorios. «Viñamos batendo os resultados agardados no primeiro trimestre, e a tendencia confírmase», afirmou Juan Carlos Escotet, que xa adianta que «hai motivos» para manter o optimismo. O presidente de Abanca fiaba así a presentación dos resultados coa actualidade, marcada polo acordo arancelario entre Europa e Estados Unidos. Un pacto que cualificou como unha «boa noticia» porque disipa unhas «expectativas complexas» e que, ao seu xuízo, non debería xerar «preocupación» en Galicia. «Terá un efecto menor e rematará favorecendo a capacidade exportadora», augurou. Para o banqueiro, o máis relevante é que entramos nun escenario de «certeza» e de menor «volatilidade», a maior ameaza para os mercados. En todo caso, garantiu que «Abanca vai estar preto dos clientes máis afectados» polas políticas arancelarias.  

Xunto ao conselleiro delegado da entidade, Francisco Botas, e o director xeral financeiro, Alberto de Francisco, Escotet revisou os resultados parciais e felicitouse polo comportamento do banco en Galicia, España e Portugal, e parou especialmente a valorar a integración da entidade portuguesa EuroBic, «que nos deu tamaño, eficiencia e mellorou o noso posicionamento» no país veciño, cuxo mercado financeiro describiu como «competitivo» e con certas semellanzas ao español. Con todo, asegurou que «o crecemento non é a obsesión. Queremos crear retorno para o accionista e mellorar a calidade de servizo aos clientes», incidiu.

Sobre outras operacións, adquisicións ou integracións mostrouse contundente, especialmente cando foi cuestionado na quenda de preguntas pola oferta do Banco Sabadell: «Rotundamente, non. Non interesa a integración no Sabadell, e non levamos a cabo integracións nas que non teñamos o control», sostivo remitíndose á decena de operacións deste tipo que confluíron no proxecto de Abanca. Tampouco aprecia un escenario que promova este tipo de operacións, aínda que a súa obrigación como operador é «revisar o que poida ocorrer». Os crecementos e rendibilidades a «dobres díxitos» son xeneralizados no sector, unha conxuntura que frea ese tipo de movementos. «Na situación actual non hai nada en carteira», resolveu Escotet, que se remitiu á campaña lanzada esta primavera na que deixaba claro que o único interese de Abanca é «fusionarnos cos nosos clientes». Esa mesma conxuntura positiva si activa a posibilidade dunha saída a Bolsa, que non será «a curto prazo» e que precisaría unha situación óptima «sostida no tempo». 

---

---

---