Un morto e dous feridos ao chocar dous camións e unha furgoneta no corredor Santiago-Noia á altura de Brión
BRIÓN
O falecido é un home de 64 anos e un dos lesionados tivo que ser evacuado en helicóptero
02 oct 2025 . Actualizado á 17:05 h.Unha colisión entre dous camións que transportaban aluminio e unha furgoneta á altura do quilómetro 12 da CG-1.5, o corredor que une Santiago con Noia, deixou un morto e dous feridos, polo menos un deles grave, xa que tivo que ser evacuado ao Hospital Clínico compostelán nun helicóptero medicalizado. O outro, un home de 54 anos con iniciais V. M. A., foi trasladado en ambulancia á Rosaleda, mentres que os sanitarios non puideron facer nada por salvar a vida do falecido, outro home, A. F. P., de 64 anos de idade.
O accidente de tráfico produciuse ás 8.50 horas neste punto da CG-1.5 que pasa pola parroquia dos Ánxeles, en Brión. Por razóns que aínda están baixo investigación, o condutor falecido, que circulaba en dirección a Santiago, chocou frontalmente contra os outros dous vehículos, que ían cara a Noia. Desde o primeiro momento a situación parecía grave, xa que unha das vítimas permanecía inconsciente e temíase que puidese haber atrapados.
Unha vez no lugar do sinistro, os equipos de emerxencias comprobaron que ningún dos tres feridos estaba atrapado no interior dos vehículos implicados, un dos cales acabou envorcado sobre a calzada. Con todo, si había un dos lesionados sen vida.
O 112 Galicia enviou á zona a Urxencias Sanitarias, a Garda Civil de Tráfico, os bombeiros de Santa Comba, o grupo de emerxencias supramunicipal GES de Brión e á Policía Local deste concello. A circulación permaneceu interrompida e desviada pola AC-543 mentres se atendía e evacuaba aos feridos e tamén mentres se procedeu á limpeza da calzada, o que provocou importantes retencións nesta estrada, que é unha das principais vías de acceso a Santiago desde a súa área metropolitana.