O Concello convocou unha asemblea veciñal para deseñar o futuro modelo de recollida do lixo
07 oct 2025 . Actualizado á 14:08 h.O Concello da Pobra está inmerso no proceso para licitar o servizo de recollida do lixo e entre o traballo previo realizado figura un informe dunha empresa especializada que pon o foco en que se recicla pouco e mal. Así o indicou o concelleiro de Medio Ambiente, Xosé Lois Piñeiro, ao sinalar que a porcentaxe de residuos que se elimina correctamente non acada o 20%, mentres que o vidro que non se deposita nos colectores adecuados representa o 50% do total.
Con estes datos na man, Piñeiro incidiu na necesidade de «mellorar en todas as fraccións e modernizar o sistema actual». Neste sentido, sinalou os prexuízos a nivel ambiental de que non se realice unha correcta eliminación dos residuos, pero engadiu que, ademais, as novas normativas europeas e estatais «fixan un maior desembolso naqueles concellos que non separan o lixo de xeito axeitado, e iso vai ter un impacto directo entre a veciñanza».
Destas cuestións falarase nunha asemblea veciñal convocada para este mércores (ás 20.00 horas, no auditorio da biblioteca municipal) que ten como obxectivo avanzar no deseño do futuro modelo de recollida do lixo no que se está traballando: «Trátase, dunha banda, de expor á cidadanía as distintas alternativas para modernizar o sistema de xestión de residuos e, doutra, de recoller as súas inquedanzas e peticións de cara a elixir a mellor opción posible».
A intención do goberno local é involucrar aos veciños no proceso coa idea de escoller o sistema de recollida máis adecuado ás necesidades do municipio. Nesta liña, o informe encargado a unha empresa externa tamén propón diversas alternativas para mellorar a prestación do servizo.