O Xara Fest, o festival feito por mozos para mozos sobe a súa aposta, este ano con C Marí, L'Haine, Lua de Santana e 9Lour
RIBADEO
Trasladan o evento ao porto de Ribadeo, incorporan unha carpa ao recinto e haberá que pagar para ver os concertos
25 ago 2025 . Actualizado á 11:33 h.O festival Xara Fest encherá Ribadeo o vindeiro sábado 30 de agosto de ritmos urbanos, nunha terceira edición que estrea nova localización. Tras unha primeira celebrada no Cantón e unha segundo no aparcadoiro municipal, a organización, a asociación sen ánimo de lucro Xara, decidiu levar a terceira ao porto. «A intención é quedarnos aí para sempre. Nós utilizamos moito a estética mariñeira e parécenos un sitio idóneo. E despois está o tema da capacidade e a facilidade de pechar o recinto, ademais de que este ano incorporamos unha carpa e é máis doado pola alí», explica Mario González, un dos cinco integrantes do colectivo que organiza o evento.
Outra das novidades do festival, co que colaboran o Concello de Ribadeo, a área de Cultura da Deputación, a Xunta e Acisa, é que non haberá after party na sala Rosas Lareira, senón que toda a actividade, salvo o mercado e a sesión vermú do mediodía, concentrarase na zona do porto ribadense. As portas do recinto abriranse ás 20 horas e o festival comezará unha hora máis tarde. As actuacións dos catro artistas alongaranse ata as dúas da madrugada e despois seguirá a festa ata ao redor das cinco no mesmo lugar cos disyoqueis Betty Bunny (Madrid), Wachu (Valencia) e Baby Romeo (Vigo).
Este último será o encargado de animar o mercadillo de roupa de marcas independentes e a sesión vermú que dará comezo ás 12.30 horas na praza de abastos de Ribadeo e estenderase ata as 17 horas. Estes disyoqueis xa amenizaron os últimos xoves pola noite a zona vella ribadense grazas a unha colaboración con Acisa Ribadeo.
Ademais, este ano será necesario pagar para acceder aos concertos. En despacho de billetes terán un prezo de 17 euros e agora pódense comprar aínda en liña por 15,93. «Primeiro sacamos uns tramos a 1, 5 e 7 euros para a xente de Ribadeo e para aqueles máis fieis, que compraron sen coñecer aínda o cartel», lembra Mario, que, do mesmo xeito que nas dúas primeiras edicións, agarda atraer a xente de toda a península e contar con «unhas 1.500 persoas», tendo en conta como avanza a venda de abonos.
C Marí, L'Haine, Lua de Santana e 9Louro compoñen o cartel desta terceira edición
Catro son os artistas principais que subirán o vindeiro sábado 30 de agosto ao escenario do Xara Fest a partir das nove da tarde. Trátase de C Marí, L'Haine, Lua de Santana e 9Louro: «C Marí é un artista valenciano que mestura varios estilos, sacou novo disco este ano e fixo unha xira por toda España de cheos, incluídos dous na sala Capitol de Santiago. L'Haine sacou un EP este ano, encheu a Riviera de Madrid e fai trap e rap. Mentres, Lua de Santana é unha artista emerxente galega que canta soul e funk en portugués e inglés, con ritmos brasileiros, e finalmente 9Louro é un mozo de Muros que une bachata con trap ou rap e este ano pegou un pelotazo tremendo».
Mario González apunta que «os que máis publico van atraer son C Marí e L'Haine, pero Lua de Santana e 9Louro van ofrecer un gran show e a xente vai pedir que repitan nas próximas edicións», conclúe.