![](https://img.lavdg.com/sc/ctzW3ZQpr2Tv9G5K57y46CW3MG8=/480x/2024/05/15/00121715788682138300846/Foto/V24J3527.jpg)
A declaración valora tanto a festividade como os rituais, cerimonias e técnicas artesanais tradicionais asociadas
21 may 2024 . Actualizado ás 05:00 h.O Corpus Christi de Ponteareas é definitivamente ben de interese cultural (BIC). O Diario Oficial de Galicia publicou este luns a súa declaración na categoría do patrimonio inmaterial. O recoñecemento chega tras os informes favorables do Museo do Pobo Galego, a Universidade de Santiago de Compostela e o Consello da Cultura Galega, nun proceso no que non se rexistraron alegacións e que se culminou coa súa aprobación no Consello da Xunta de Galicia do pasado 22 de abril.
Esta declaración valora tanto a festividade como os rituais, cerimonias e técnicas artesanais tradicionais asociadas. Recoñécese que o Corpus Christi constitúe un ritual festivo recoñecido polo seu uso social e cerimonial cunha alta presenza de coñecementos populares sobre a natureza, os elementos naturais e os ciclos do campo. Ademais, ponse en valor a confección das alfombras, un conxunto artístico dotado de variadas representacións e símbolos, cunha significación cultural que vai máis aló do ámbito relixioso para vincularse coa cultura popular.
A máxima protección desta festa débese, tamén, ao elevado coñecemento e desenvolvemento de técnicas artesanais tradicionais. Exactamente, tense en conta o proceso de creación do conxunto ornamental, alfombras florais, cruceiros vexetais ou altares que conforman todo un conxunto de arquitecturas efémeras.