A alcaldesa máis nova: «Sendo unha muller de 24 anos tes que demostrar continuamente que vales para o cargo»

Hai exactamente un ano, Uxía Oviedo de Dios era investida alcaldesa do municipio ourensán de Maceda (2.878 habitantes). Converteuse, dese modo, na rexedora máis nova de Galicia. Entón tiña 23 anos, agora 24, e a experiencia está a ser todo un reto, segundo confesa. Nunca antes fora concelleira, aínda que o seu pai, Xabier Oviedo, fora alcalde da localidade e ela levaba tempo militando nas Xuventudes Socialistas.

Este primeiro ano no cargo serviulle «para empezar a entender como funciona o Concello», segundo di. «Aprendes todos os días cousas distintas. É algo moi enriquecedor o crecemento persoal que conleva estar á fronte dun Concello», di Uxía Oviedo, para a que esta é tamén a súa primeira experiencia laboral. Antes de converterse en alcaldesa, acababa de rematar a carreira de Belas Artes, pero estaba decidida a probar no mundo da política: «É un paso que sempre tiven en mente que quería dar. É certo que non imaxinaba que chegaría tan pronto ao cargo, pero estou moi contenta e síntome moi orgullosa de que a xente confiara en min».

Para a súa investidura, Oviedo contou co apoio do BNG, que se integrou no goberno. Este funciona «como un equipo unido, que é como ten que ser», di a alcaldesa e, por agora, non transcenderon problemas internos. A principal dificultade á que tivo que enfrontarse é a reacción xeneralizada de quen só ven que é unha muller nova. «Sendo unha muller de 24 anos tes que demostrar continuamente que vales para o cargo. É unha loita diaria», di Uxía Oviedo, que cre que ocorre así porque «a norma é que os alcaldes teñen que ser homes de máis de 40 anos». A pesar de as dificultades, ela ver como unha oportunidade de «ir abrindo camiño para a xente que veña detrás, para que vexa que pode ocupar cargos de representación e que non vales máis ou menos pola idade que tes nin polo teu sexo».

Por outra banda, o feito de que o seu pai fose alcalde de Maceda entre os anos 2007 e 2015 levaba a certa confusión. «Agora xa non tanto, pero ao principio dábanse moitos casos de veciños que se dirixían a el», lamenta Uxía Oviedo, que subliña que ela charla co seu pai sobre as súas inquietudes, como o fai calquera fillo, aínda que recoñece que con máis razón «se o teu pai xa estivo nesa situación e pode darche algún consello». En calquera caso, a alcaldesa —que vive independizada onda a súa parella— subliña que é ela quen goberna. E está moi contenta de facelo. «Hai xente que di: ‘‘A ver canto che dura a ilusión, que este é un mundo moi complicado''. Pero non é así, esa ilusión do principio segue estando aí», proclama.

---

---

---