A Consellería de Cultura promove unha exposición sobre a cultura escandinava e a súa relación con Galicia
08 jun 2025 . Actualizado á 23:25 h.A Consellería de Cultura promove a exposición Viquingos. Unha mirada desde Galicia, que se inaugurará hoxe no Museo do Mar de Galicia, e coa que se pretende profundar na difusión da pegada dos pobos nórdicos na cultura galega. Este proxecto, que poderá visitarse en Vigo desde o martes ata o 28 de setembro no horario habitual do centro, reúne un corpus expositivo conformado por pezas procedentes de museos de Galicia, Andalucía e Suecia. Este novo paso supón unha extensión dUnha vida viquinga, a exposición que o Museo Centro Gaiás acolleu no segundo semestre de 2024.
Agora, o Museo do Mar de Galicia explora a senda aberta por Unha vida viquinga cunha proposta expositiva propia que ofrecerá ao público unha perspectiva diferente e innovadora. Se a exposición da Cidade da Cultura de 2024 mostraba unha radiografía universal sobre a cultura viquinga, a mostra da institución viguesa pon o foco no máis próximo, a pegada das expedicións escandinavas en Galicia.
O proxecto nútrese de fondos pertencentes a once museos e institucións, das cales nove son galegas, unha sueca e outra andaluza. Poderanse ver pezas arqueolóxicas procedentes de entidades como o Museo das Peregrinacións, Museo Provincial de Pontevedra, Museo Arqueolóxico Provincial de Ourense ou da Diocese de Mondoñedo. Este material convivirán en Alcabre con outras chegadas do conxunto arqueolóxico de Madinat ao-Zahra (Córdoba) ou do Gotlands Musem (Suecia). Esta institución sueca achega medio centenar de pezas que permitirán comprender o estilo de vida, os costumes e os oficios máis habituais entre os pobos escandinavos durante a chamada era viquinga, período que se estende desde o século IX ao XII. Ferramentas, xoias, puntas de lanza, utensilios de hixiene persoal, como peites ou limpadores de oídos, permitirán achegarse a unha cultura que vai moito máis alá do clixé de pobo violento e conquistador que perdura no imaxinario colectivo.
O público terá á súa disposición, ademais, obxectos fundamentais para comprender o impacto que tiveron as incursións viquingas no territorio galego durante a Idade Media. Neste apartado galaico, destaca a pedra fundacional das Torres do Oeste, situadas en Catoira, ou o báculo de Gonzalo, bispo do cal a lenda din que rezou desde o alto fronte á costa e fixo afundir de forma milagrosa a práctica totalidade dunha flota viquinga. Outros elementos, como moedas, colares ou restos arquitectónicos servirán para conformar unha idea clara de como era a vida en Galicia.
O Museo do Mar contará nesta exposición con pezas singulares, como é a recreación de gran parte dun navío viquingo realizada en pezas de cartón polo estudo galego Cenlitros a partir dos exemplares conservados no Museo de Barcos Viquingos de Roskilde (Dinamarca) ou catro pezas audiovisuais animadas con ilustracións de David Rubín, un dos autores galegos de banda deseñadas con maior proxección internacional.