Aberto a canle que comunica a lagoa de Baldaio co mar para frear as inundacións
SOMOS MAR
O paso levaba seis meses pechado
08 dic 2025 . Actualizado á 11:26 h.A lagoa de Baldaio (Carballo) xa ten saída ao mar, despois de seis meses e dos traballos realizados a pasada semana para abrir unha canle. Aínda que a ondada e o temporal non axudaron, finalmente foi posible abrir unha vía e conseguir que gran parte do exceso de auga acumulada durante o último semestre teña saída ao océano. Na mañá de onte podíase comprobar a corrente de saída.
O mércores pola tarde comezaron as tarefas, aínda que ese día apenas se puido facer labor. A area taponara por completo a canle que comunica a masa lacustre co mar. Ocorrera no mes de xuño. Os mariscadores levaban todo este tempo reclamando a realización destes traballos para evitar a mortaldade dos bivalvos. Con todo, foi coa chegada das choivas cando a situación se fixo insostible, pois as achegas hídricas provocaron que o nivel da auga aumentase ata o punto de provocar inundacións e cortar vías de comunicación aos veciños.
O concelleiro de Medio Ambiente de Carballo, Miguel Vales, apuntou onte que os traballos realizados deron resultado. Os camiños xa están libres de auga. Segundo púidose comprobar onte pola mañá, as mareas vivas da fin de semana non impediron o desaugadoiro da lagoa.