A Xunta activa a alerta laranxa no oeste e suroeste da Coruña por ventos con refachos de ata 100 quilómetros por hora
SOCIEDADE
Suspéndense as actividades no exterior dos centros educativos nos municipios desas zonas e tamén a actividade deportiva federada en parte da provincia coruñesa
08 dic 2025 . Actualizado á 21:19 h.A Xunta activou para este martes a alerta laranxa por vento no oeste e suroeste da provincia da Coruña, con refachos de ata 100 quilómetros por hora, e mantense o mesmo nivel de aviso por temporal costeiro nos litorais coruñés e lucense. Segundo a Axencia Estatal de Meteoroloxía (Aemet), a alerta laranxa por vento empezará a estar activa durante as últimas horas do luns.
Doutra banda, mantense o aviso laranxa por temporal costeiro que xa se activara, informa a Consellería de Presidencia, Xustiza e Deportes. Permanecerán neste nivel os litorais da Coruña e Lugo por ventos do sur ou suroeste de ata forza nove e mar combinado do oeste ou suroeste, con ondas de ata sete metros.
Debido á alerta por vento, a Comisión Escolar de Alertas decidiu suspender ata as 16.00 horas do martes as actividades no exterior dos centros educativos nos municipios do oeste da Coruña (Camariñas, Carnota, Cee, Corcubión, Dumbría, Fisterra, Mazaricos, Muxía, Vimianzo e Zas) e do suroeste (Boiro, Dodro, Lousame, Muros, Noia, Outes, Padrón, A Pobra do Caramiñal, Porto do Son, Rianxo, Ribeira e Rois). Tamén se suspendeu toda a actividade deportiva federada e do programa Xogade que se realice no exterior desde esta medianoite ata as 15.00 horas do martes no oeste e noroeste da Coruña, e desde medianoite ata as 9.00 horas no suroeste coruñés.
A actividade deportiva federada e de Xogade que se desenvolva no mar suspéndese desde as 9.00 ata as 24.00 horas do martes na Costa da Morte, desde as 10.00 ata as 24.00 horas no noroeste desta mesma provincia e desde as 12.00 ata as 24.00 horas no suroeste coruñés, Rías Baixas e Miño de Pontevedra. Na Mariña de Lugo a suspensión vai desde esta medianoite ata as 14.00 horas do martes.
A Xunta lembrou a importancia de manterse afastado da liña de costa, tanto en diques como en rompeolas e paseos marítimos, e pediu que se extremen as medidas de seguridade á hora de realizar calquera actividade no mar; insiste ademais en que se revisen os cabos e amarres das embarcacións. Tamén sinalou a importancia de retirar os obxectos que poidan caer á rúa desde tellados, balcóns e fiestras, e así como evitar pasar preto de edificios en ruínas ou en construción, árbores, paneis publicitarios e obxectos susceptibles de desprazarse co vento.