Mexillón de Galicia retoma a certificación en fresco nun momento no que a toxina reduce a oferta
SOMOS MAR
O produto acadou a calidade que se esixe ao bivalvo para levar o selo de orixe, di o Consello Regulador
13 sep 2022 . Actualizado ás 04:44 h.O Consello Regulador do Mexillón de Galicia retomou o proceso de certificación do bivalvo en fresco, tendo en conta que considera que o produto acadou a calidade que se lle esixe para portar o selo da denominación de orixe protexida (DOP) e garantir que se atopa nun momento óptimo para o seu consumo.
O malo é que ese instante máis oportuno para o consumo de Mexillón de Galicia non é precisamente o que máis produto pode chegar aos peiraos, pois dous episodios tóxicos, un de lipofílicas e outro de paralizante (PSP) hanse confabulado para pechar á extracción a maior parte das bateas galegas. Do norte e do sur. Actualmente, só pode chegar mexillón ao mercado de quince dos 52 polígonos que hai en Galicia: dos do interior da ría de Arousa e dos da de Muros-Noia, onde só hai un parque pechado.
Sada e as áreas de Pontevedra e Vigo están afectadas os episodios tóxicos. As bateas sadenses están vedadas por lipofílicas, que tamén castigan aos polígonos pontevedreses, algún dos cales está azoutado por ambas as toxinas e en Vigo os viveiros que non están afectados pola diarreica, estano pola paralizante.
Por iso que a tempada de certificación coincide nun momento no que a descarga está limitada e a oferta de produto, xa que logo, é reducida.
Exhaustivos controis
Obviamente, como en anteriores episodios, o produto que chega ao mercado está en condicións hixiénico-sanitarias para o seu consumo. Con selo ou sen selo, pero, ademais, no caso de Mexillón de Galicia, «un alimento único, dunha calidade superior» —apostilan desde o Consello— Regulador está avalado, ademais de por os controis que realiza o Intecmar para toda a produción, polas rigorosas inspeccións que se realizan ao longo do seu período de cría.
A etiqueta que acompaña ao produto é o último elo «dun proceso rigoroso de control que se inicia coa obtención da semente nas rochas do litoral, continúa na propia batea e segue no momento da súa descarga en porto». Esa supervisión, que tamén se realiza no resto da cadea de produción, tanto nos centros de depuración e transformación, así como nos puntos de venda. Por iso, estar ante un mexillón con selo é ter a certeza de que se trata de bivalvo coas características distintivas de «calidade e orixe que só achega a nosa marca».
