Elevada afluencia e bos prezos no regreso do mercado gandeiro de Silleda
GANDERÍA
Tras cinco semanas pechada para evitar a dermatosis nodular, a lonxa reabriu as súas portas con absoluta normalidade
02 dic 2025 . Actualizado á 16:52 h.«Esta é coma unha feira normal». Esa é a frase que máis repetiron os tratantes de gando que se persoaron á primeira hora deste martes na Central Agropecuaria de Galicia para participar no primeiro mercado de gando que este recinto celebra en seis semanas. Porque Silleda, do mesmo xeito que Amio, viuse obrigada a pechar as súas portas a finais do mes de outubro co obxectivo de evitar a aparición da dermatosis nodular contaxiosa en Galicia, unha enfermidade que apareceu naquelas datas en Cataluña e da que, por fortuna, xa non se detectou positivos nas últimas semanas. A recuperación destes certames supón o inicio da desescalada nas medidas impostas para previr a aparición da enfermidade. Pero aínda quedan outras en vigor, como a obrigación de manter a corentena na explotacións que traian animais doutras comunidades ou de fóra do país.
Como manda a tradición, a maioría dos tratantes chegou ben cedo ao recinto de Silleda. Porque moitos deles teñen que avaliar centenares de animais antes de facer as súas ofertas, que se pechan ao redor das dez da mañá. Unha hora despois coñécense os prezos e que animais se levou cada un, que serán aqueles polos que fixesen a poxa máis alta. «O mercado cumpre unha dobre función, que é vender o gando ao máximo prezo para o gandeiro e ofrecer aos compradores un espazo no que ten acceso a todos os animais», explicou Ricardo Durán, director xeral da Fundación Semana Verde. A entidade mostrouse encantada de poder recuperar a súa actividade tras cinco semanas de parón.
«Recuperouse a normalidade. Tiñamos cotas para evitar un exceso de tenreiros e cumpríronse. É como un martes normal», engadiu. E a mesma opinión compartían os tratantes. «Nestas semanas os animais foron marchando para un lado ou para outro e isto é coma unha feira normal», aseguraba un deles que estaba ás portas das oficinas, agardando a coñecer as cotizacións finais. Porque nas cinco semanas nas que Galicia estivo sen mercados de gando, a venda de animais levou a cabo de forma directa coas granxas, permitindo así a saída de becerros con destino a cebaderos ou matadoiros «Si que hai unha boa afluencia, pero é certo que estas últimas semanas estivemos traballando coas cuadras de trato», engadiu José Manuel García Pazos, outro dos operadores de gando de Silleda.
Aínda que a maioría dos gandeiros optou por seguir comercializando os seus animais a través dos cortellos de trato, houbo ningúns que preferiron agardar o regreso dos mercados e iso notouse na lonxa. «É certo que hai algúns becerros que son máis grandes, porque os aguantaron sen saír das granxas», explicou García Pazos. Pero estes animais cotizáronse ao mesmo prezo que o resto. «Esto foi mais ou menos coma unha feira normal, pero é certo que hai animais máis grandes, porque moitos quedaron gardados nas granxas e agora son máis fortes», reiterou o responsable de Gañados Abuín.
En canto a prézooss, «foron coma os das últimas feiras, máis ou menos. Excepto por algún exemplar que foi moi bo, se mantiveron», engadiu. «Os animais cada día están máis caros, eu creo que subiron os prezos», argumentou o responsable de Gandería Pedrouzos. Calculaba que a media dos tenreiros rozara os 1.200 euros.
Os datos facilitados pola central ao peche da lonxa confirmaron o sentir dos tratantes: a sesión foi similar á rexistrada hai cinco semanas. Houbo máis becerros de recría, preto de oitenta máis, cunha cotización media inferior á de entón, de case vinte euros por animal. En cambio, houbo menos exemplares de vacún maior, case a metade que hai cinco semanas, aínda que con prezos medios superiores aos daquelas datas. As mellores cotizacións acadáronas os terceiros carniceiros, pois as súas cotizacións medidas foron máis elevadas, preto de trescentos euros máis. De feito, a central rexistrou o prezo medio máis elevado que estes animais acadaron nunca e que foi de 1.827 euros.
Levantamento de medidas
Galicia non é a única rexión que comezou a desescalada das medidas postas en marcha para evitar a dermatosis nodular, despois de que o país leve máis dun mes sen novos positivos. Asturias abriu o mercado de Pola de Siero para vender bovinos que leven na comunidade desde o pasado 22 de outubro. E Francia, país que se viu sacudido nos últimos meses por varios brotes, decidiu esta mesma semana levantar as restricións nunha das zonas afectadas, a situada no departamento de Ain. Dentro desta rexión os bovinos xa poden circular libremente. Tamén autoriza que estes animais, baixo condicións de vacinación e tras un exame veterinario favorable, poidan saír desta zona e incorporarse a unha rexión das consideradas libres da enfermidade.