Os ferroláns deron unha boa imaxe, enviaron un balón ao pau e faltoulles acerto en ataque
03 dic 2025 . Actualizado á 00:29 h.O Huesca botou ao Racing de Ferrol da Copa do Rey na segunda eliminatoria desta competición, disputada no campo da Malata. Os ferroláns xogaron a un bo nivel, aínda que pagaron caro os erros en defensa e faltoulles acerto á hora de aproveitar as ocasións. Os verdes perderon por 0-2, nun partido no que a imaxe do equipo non foi mala, aínda que aos ferroláns lles segue faltando gol. Na segunda parte enviaron un balón ao pau e desaproveitaron boas ocasións de gol.
O Huesca deixou patente a súa calidade no seu primeiro achegamento á área, aos 15 minutos, tras un mal despexa de Edgar Pujol, o balón chegou a Ángel Pérez, que cun disparo cruzado adiantou aos oscenses no marcador. O Huesca aproveitou o primeiro erro do Racing en defensa para conseguir o seu primeiro gol.
O Racing tocou ben o balón, chegou arriba, aínda que máis con sensación de perigo que con accións claras de gol. Aos 26 minutos puido haber un penalti por unha carga a David Carballo na área, aínda que o árbitro non viu nada irregular na xogada, e a acción quedou en nada xa que nesta segunda rolda non hai VAR.
Tras moitos minutos de xogo de toque, sen achegamentos á área, o Huesca dispuxo dunha nova ocasión de gol, aos 40 minutos, tras unha mala saída de Lucas Díaz, Ángel Pérez tirou a porta baleira, aínda que Zalaya evitou o gol.
Antes do descanso, nunha nova chegada á área, a acción foi clara para Antón Escobar, aínda que despexou a defensa.
No inicio da segunda parte, tras unha acción de estratexia, Ntamack tivo o segundo para o Huesca cun disparo de socato, aínda que o porteiro do Racing logrou deter o balón. Aos 57 minutos tamén a tivo Ángel Pérez, aínda que o porteiro racinguista tapou ben e impediu o gol
O Racing tivo a súa mellor ocasión aos 58 minutos cun disparo de Gelardo que estrelou o balón na cepa do poste. Só dous minutos máis tarde tamén tivo unha grande ocasión Antón Escobar, cun gran remate de cabeza, aínda que o balón saíu rozando o traveseiro. O Racing insistiu en ataque, sobre todo con entradas por banda, aínda que sen acerto no remate.
Segunda gol do Huesca
Os dous equipos meteron a xogadores de refresco, en busca dunha última arrancada, aínda que nunha rápida contra o franco camerunés Ntamack logrou o 0-2 aos 71 minutos de partido. A eliminatoria estaba sentenciada.
A entrada de Pascu, Álvaro Peña ou Álvaro Giménez deu outro aire ao ataque do Racing de Ferrol, que xogou con dúas puntas. Os xogadores racinguistas chegaron arriba con claridade pero non tiveron acerto. Ademais, o Huesca creou perigo nas contras. O Racing perdeu por 0-2 e quedou fóra da Copa.
Ficha Técnica
0: Racing. Lucas Díaz; Migue Leal, Edgar Pujol, Zalaya, Saúl García Álvaro Ramón, min 62); Aitor Gelardo (Álvaro Peña, min 68), Ander Gorostidi, David Carballo (Pascu, min 46); Azael (Jairo, min 68), Antón Escobar, Raúl Dacosta (Álvaro Giménez, min 74)
2: Huesca. Dani Martín; Carrillo, Hugo Pérez, Arribas, Ro, Luna (Willy Chatiliez, min 60), Sielva (Jesús Álvarez, min 46), Manu Rico Kortajarena, min 74), Ángel Pérez (Portillo, min 60), Enol (Albarracín, min 80) e Ntamack.
Goles: 0-1, min 15: Ángel Pérez; 0-2, min 71:Ntamack.
Árbitro. Germán Cid Camacho (Colexio de Castela e León). Amarela a Raúl Dacosta no Racing, así como a Manuel Rico no Huesca.