A central acollerá hoxe a súa primeira poxa tras cinco semanas sen actividade
02 dic 2025 . Actualizado á 11:35 h.Ás nove da mañá do luns, Chema López e os seus compañeiros subíronse aos seus camións para retomar unha actividade que quedou en suspenso o pasado 27 de outubro: trasladar aos animais á lonxa de gando de Silleda. A central volve hoxe a recuperar a súa actividade tras cinco semanas de parón para previr a aparición da dermatosis nodular contaxiosa na comunidade, despois de que aparecesen varios positivos en granxas de Cataluña. A expectativa é máxima, aínda que non se prevé unha afluencia fóra do normal.
«Non hai gando retido, porque se estivo cargando durante todo este tempo, pero a volta aos mercados supón un alivio para todos», contan desde a asociación de tratantes de gando. Explican que esta feira nútrese, sobre todo, de gando da comunidade, polo que non haberá problemas de afluencia, pois hai que lembrar que nestes mercados non poderán participar animais de fóra. «Si que hai un circuíto roto, que é o dos pasteiros, que se nutre de Torre la Vega e Pola», afirman. Pero no resto agarda normalidade, «porque tamén os nosos operadores poden sacar animais fóra de Galicia, se van para matadoiro», engaden.
Así que, durante a xornada do luns, os camións volveron percorrer as granxas, recollendo aos animais con destino a Silleda. Chema Pérez, que traballa para unha empresa de transporte, contaba onte que levaban «133 pequenos, tres vacas e once becerros de cebo, o normal». Cifras que poderían ser maiores, pero en Silleda impera unha cota máxima de animais de recría, que limita a cantidade de tenreiros que se poden comercializar.
A pesar de que durante estas cinco semanas seguiron traballando, «para levar animais aos matadoiros e aos cebadoiros», Chema considera que a afluencia á sesión de hoxe será elevada. E tamén ás seguintes. «Esta semana levamos 133 animais e para a que ven xa temos 80 reservados», explica. Porque, tras o peche, houbo gandeiros que preferiron blindar as súas explotacións. «Houbo gandeiros que non quixeron mover o gando e esperaron ás feiras», explica.
Os tratantes, pola súa banda, confían en que a reapertura dos mercados permita ir devolvendo a normalidade a un sector que vai de sobresalto en sobresalto, pois antes que a dermatosis as explotacións víronse afectadas pola Enfermidade Hemorráxica Epizoótica e pola Lingua Azul, ente outras. As actuais medidas para evitar a aparición da dermatosis tamén obrigan ás explotacións galegas a pór en corentena durante 21 días a todo bovino que chegue de fóra da comunidade. E, aínda que nun principio iso paralizou a chegada de animais, «agora xa hai explotacións que che din que lles da igual a corentena, porque non teñen suficiente gando e precisan meter de fóra», din os tratantes.
O colectivo pedirá á Consellería do Medio Rural unha solución para os operadores galegos que traen animais doutras partes de Europa, como Francia, Bélxica ou Dinamarca. «Ata o de agora foron aguantando, pero levan un mes e medio sen traballar. Agora hai que darlles algunha solución e tomar medidas para indemnizalos porque están sen ingresos», afirman desde a asociación.
Semana Verde retoma a lonxa coa cota cuberta para becerros de recría e carniceiros
As cinco poxas suspendidas pola prevención fronte á dermatosis nodular representan máis de 7 millóns de euros
javier benito
O recinto feiral de Semana Verde en Silleda retomará hoxe as súas habituais poxas de gando. Regresa a Central Agropecuaria de Galicia tras cinco semanas consecutivas de parón debido ás medidas de prevención activadas pola Consellería do Medio Rural fronte á dermatosis nodular contaxiosa. Un feito histórico para esta feira de gando e que se suma ao ocorrido no 2020 pola pandemia do covid, tamén con varias sesións sen celebrar. A iso engádense algunhas suspensións puntuais por diversos motivos, entre eles pola propia organización interna ou celebración de certames como Semana Verde.
A demanda previa apunta a que os gandeiros galegos estaban a agardar con expectación a celebración de novo do mercado silledense. Hai que lembrar que a Xunta autorizou retomalos tan só para reses bovinas procedentes de explotacións de Galicia. A Central Agropecuaria de Galicia fixou unhas cotas máximas en cada sección para garantir o benestar dos animais e a previsión reflicte que haberá unha alta concorrencia hoxe na lonxa.
En función das peticións realizadas por operadores comerciais, transportistas e particulares, a previsión establece que se acadará a cifra máxima establecida en dúas das seccións. En concreto nas dúas relativas a becerros, con 910 no caso da recría como tope e 240 na de carniceiros. Mentres, onte non había previsión de que se complete a cota fixada para o vacún maior, de 440 cabezas.
Media de 1,4 millóns por sesión
As cinco sesións sen celebrar sen dúbida que afecta de forma moi significativa á facturación da Central Agropecuaria. As transaccións medidas por sesión no que levamos do 2025, segundo informaban onte desde Semana Verde, acadaron os 1,4 millóns de euros. Se multiplicamos esa cifra por cinco, o número de feiras suspendidas, acadamos os siete millóns de euros. Unha contía realmente relevante que farán resentirse o balance anual do mercado gandeiro silledense.
Sen dúbida será imposible chegar á facturación conxunta do 2024, cando se facturaron na lonxa 39,6 millóns de euros e os 53.732 animais a poxa. Servir como dato que eses sete millóns case representan un 20% do volume de negocio global do pasado ano. Quizais poida matizarse un pouco esa previsible caída respecto ao pasado ano, xa que no que levamos do 2025 houbo máis entrada en xeral de gando cada semana en Silleda e subiron os prezos medios por exemplar, incluso con varios marca conseguidos.