O Ozempic tamén é bo para o corazón

A acumulación de depósitos de graxa ao redor do miocardio e as arterias coronarias —o que se coñece como tecido adiposo epicárdico— pode provocar unha inflamación e, por tanto, un aumento do tecido, incrementando as posibilidades de sufrir arritmias. É, por tanto, un factor de risco para o desenvolvemento e a progresión de enfermidades cardiovasculares.

Con isto claro, a investigadora predoctoral do Instituto de Investigación Sanitaria de Santiago de Compostela (IDIS), Rumeysa Basdas, quixo saber que efecto preventivo tería o uso da semaglutida —Ozempic—. Axudáronlle na súa análise Sonia Eiras, líder do grupo de Cardioloxía Traslacional do IDIS, e José Ramón González Juanatey, a cargo do grupo de Cardioloxía.

Tras estudar 67 biopsias de graxa epicárdica e subcutánea de pacientes sometidos a cirurxía cardíaca, os investigadores concluíron que, efectivamente, este fármaco, que mellora a sensibilidade á insulina e reduce a cantidade de tecido adiposo epicárdico, podería ser unha estratexia terapéutica para pacientes con patoloxía cardiovascular. Os resultados do seu traballo —Semaglutide Modulates Proinflammatory Epicardial Adipogenesis With Paracrine Effects on hiPSC-Atrial Cardiomyocyte— foron publicados na prestixiosa revista americana Journals of the American College of Cardiology (JACC).

---

---

---