Os reis puxan por un lote de pescada e outro de bonito na lonxa durante a súa visita a Burela para coñecer o sector pesqueiro
A MARIÑA
Desde as 12.26 ata as 14.38 horas percorreron a confraría, a nave de redes, o barco museo Reina do Carmen, o pincheiro Breogán Un e o concello, en todo momento seguidos por numeroso público
17 jun 2025 . Actualizado á 16:35 h.Despois de chegar Felipe VI e Letizia este mediodía a Burela, ás 12.26 horas ao porto, en medio dunha grande expectación, finalizaron a visita á localidade ás 14.38 horas, tras un primeiro tramo de percorrido oficial polo porto e diferentes instalacións relacionadas co sector pesqueiro, e un segundo, xa ante a Casa do Concello, onde tamén foron recibidos por numeroso público, algúns veciños tras os valos e outros desde as fiestras e balcóns das casas. Os reis despedíronse dos burelenses, quen lles exclamou: «Viva España!». Os veciños tiveron ocasión de charlar con eles, sacarse fotos e regalarlles algún que outro ramo de flores.
Foi antes de que entrasen na casa do concello, onde houbo unha visita de carácter privado durante a cal os reis asinaron no Libro de Honra do Concello: «Alégranos moito ter hoxe a oportunidade de visitar o Concello de Burela e transmitir o noso afecto e recoñecemento á súa historia e o seu presente tan vinculado ao mar, á pesca e que tanto achegan a Galicia e a España, ao noso peso europeo e mundial nun sector polo que debemos loitar para garantir o seu futuro. Grazas polo voso cariño e por manter con tanto afecto e constancia as vosas tradicións e os vosos vínculos, con este marabilloso recuncho de Lugo e de Galicia, con toda España. Moi afectuosamente, Felipe Rey. Letizia Reina».
Fóra do edificio saudaran primeiro á corporación local e ás xogadoras do Burela FS, coas súas sete Copas da Raíña e nomeado en 2021 e 2022 mellor equipo de fútbol sala feminino do mundo. Nunha especial dedicatoria, sinalaron: «Grazas polo voso cariño e por manter con tanto afecto e constancia as vosas tradicións e os vosos vínculos, con este marabilloso recuncho de Lugo e de Galicia, con toda España Moi afectuosamente».
Nesta visita oficial deulles a primeira benvida o ministro de Pesca, Luis Planas, e o presidente da Xunta, Alfonso Rueda, antes de dirixirse á Confraría de Pescadores, ao Barco Museo Reina do Carmen e o pincheiro Breogán Un, onde recibiron explicacións sobre artes de pesca. Achegáronse posteriormente a unha das salas da lonxa, onde coñeceron o funcionamento dunha poxa de peixe, sendo testemuñas dunha, da man de Miguel Neira, xerente de Absa. Incluso lvos reis puxaron por un lote de bonito e outro de pescada do petisco. Precisamente, hai que lembrar, este último pescado estivo presente no menú da voda dos reis, a proposta do Grupo Nove.
Chegaron en helicóptero á Marosa
Nada máis chegar a Burela, tras aterrar o helicóptero na zona da Marosa, recibiron na confraría burelense de pescadores unha primeira e sucinta explicación acerca dos murais alí expostos desde hai uns meses, e posaron todos xuntos para os fotógrafos, antes de entrar nas instalacións do depósito local. Nalgunha das súas paradas, os reis tiveron ocasión de de dialogar con traballadores do sector pesqueiro, cos mariñeiros e coas redeiras.
Numeroso público xa se achegou á chaira portuaria para velos chegar horas antes, así como ao longo do seu percorrido pola localidade mariñá, onde máis autoridades, como a nova conselleira de Pesca, Marta Villaverde, a alcaldesa de Burela, Carmela López, o presidente de Deputación Provincial de Lugo, José Tomé, e o delegado territorial da Xunta de Galicia, así como membros da corporación municipal burelense (salvo o BNG, que xa indicara previamente que non acudiría) ou Basilio Otero, patrón maior de Burela e presidente da Federación Nacional de Confrarías de Pescadores, formaron parte da comitiva de recibimento. Os edís burelenses luciron pins especiais, feitos por usuarios da Fundación Eu Son.
A asistencia de Felipe VI e dona Letizia á descarga de peixe foi relevante porque se produce en plena campaña do bonito do norte, pesca na que Burela é un porto de referencia. O barco Reina do Carmen, cabe lembrar, foi un bonitero na súa época activa, antes de converterse nun museo flotante e atractivo turístico. Para coñecer de preto o mundo do mar, ademais da confraría, visitaron a nave de redes, onde se atoparon con redeiras e estibadores, antes de dirixirse ao peirao para ver un dos barcos construídos en Estaleiros Armón.
Tamén ao lugar da visita desprazouse unha representación do comité de empresa de Alcoa, con camisetas brancas. Falaron cos reis e José Antonio Zan, presidente do órgano sindical, entregoulle a Felipe VI unha carta.