As temperaturas empezarán a subir e os ceos permanecerán principalmente despexados a partir deste martes
21 abr 2025 . Actualizado á 19:05 h.O bo tempo volve a Galicia despois dunha Semana Santa pasada por auga que deixou choivas intensas en toda a comunidade e un frío pouco habitual para esta época do ano. E é que os ceos despexados regresarán a partir deste martes acompañados dun ascenso continuado das temperaturas que se notará especialmente no sur da comunidade. Este cambio será posible grazas á influencia que irá gañando progresivamente o anticiclón dos Azores, que fará que a semana sexa bastante seca en xeral, sinalan desde Meteogalicia.
Con todo, as provincias de Lugo e A Coruña aínda poden sufrir algunha precipitación débil debido á chegada de frontes pouco activos que poderían provocar algún orballo na metade norte. Ademais, segundo a Aemet (Axencia Estatal de Meteoroloxía), o martes agardan brumas e néboas en zonas altas do interior durante a mañá e a noite. En canto aos ceos, en liñas xerais presentarán nubes e claros, aínda que haberá algún intervalo nubrado ao longo do día. E con respecto ás temperaturas, estas serán lixeiramente superiores ás da semana pasada, cunhas máxima situadas entre os 16 graos (Lugo) e os 21 (Ourense) e unhas mínimo entre os 6 (Lugo) e os 10 (A Coruña).
Este mércores o tempo seguirá mellorando en correspondencia coa subida dos termómetros. En Ourense a máxima situarase nos 24 e en Pontevedra nos 22, mentres que en Lugo será de 20 e na Coruña de 18. No entanto, os ceos continuarán con intervalos nubrados na metade norte, onde de novo podería haber precipitacións débiles e dispersas, sobre todo en zonas de montaña. En cambio, no sur de Galicia o sol brillará nun ceo que permanecerá despexado a maior parte do día.
O xoves o bo tempo continuará o seu curso, sobre todo nas provincias de Ourense e Pontevedra, onde os termómetros chegarán ata os 27 e 25 respectivamente, unhas temperaturas que parecen anticipar xa o verán. Pero Lugo e A Coruña non quedarán atrás, xa que acadarán á súa vez os 23 e 20, aínda que este aumento será menos acusado no litoral. O tempo, con todo, pode volver cambiar o venres, xa que cara ao final da semana entrará unha fronte de nubes que deixará algunhas precipitacións no norte da comunidade, o que podería facer descender as temperaturas, indica Meteogalicia.