A directiva espera atopar substitución durante esta semana
02 oct 2025 . Actualizado á 05:00 h.O IES do Milladoiro (Ames), cunha matrícula que supera o medio milleiro de escolares tras once anos de actividade lectiva, podería quedarse sen a súa asociación de nais e pais (ANPA), unha figura fundamental no funcionamento dun centro educativo como representante das familias do alumnado. A razón deste baleiro está en que a actual directiva do colectivou AnpaMilla non atopa substitución para garantir a continuidade da asociación, que nos seus anos de existencia desenvolveu unha intensa actividade dentro e fóra das aulas.
A directiva saínte confirmaba nunha comunicación pública da súa páxina web que na asemblea do 16 de xuño, antes de que rematase o curso pasado, a presidencia desta xunta directiva presentara a súa dimisión, unha renuncia que nestes casos faise extensiva a todo o equipo, que nese momento xa confirmou que non se presentaría á reelección e ofreceu o seu apoio e asesoramento ás persoas que asumisen a substitución.
A asociación celebrou o pasado 15 de setembro unha asemblea extraordinaria para a presentación de candidaturas, pero dese encontro non saíu ningunha proposta de renovación, polo que xa saltaron as primeiras alarmas sobre o futuro desta entidade. Na devandita asemblea, segundo afirma a directiva saínte no seu último comunicado publicado na súa páxina web e en distintas redes sociais, destacaron que se non hai nova directiva que xestione a ANPA «perderanse recursos económicos, desaproveitarase a posibilidade de poder solicitar as axudas económicas que todos os anos publícanse para este tipo de asociacións e, por conseguinte, perderase a posibilidade de colaborar nas diferentes actividades que se organizan no IES do Milladoiro». Tamén desaparecerá a a representación das familias.
Unha disolución tamén implicará a perda do diñeiro da entidade, un fondos que segundo traslada a directiva ás familias, «poderían empregarse en partidas para o goce dos vosos fillos e fillas e na actividade extraescolar de inglés que se organiza dentro do instituto». A directiva saínte celebrou o pasado martes, 30 de setembro, unha nova reunión para buscar substitucións, pero a asistencia foi escasa, polo que fixeron outra convocatoria para o vindeiro luns , día 6, coa esperanza de que se constitúa algunha candidatura que poida asumir a substitución no colectivo AnpaMilla.
A actual directiva insiste en que se isto non ocorre «perderase a representación das familias e, por tanto, a posibilidade de defender as nosas demandas». «Lembremos que fai dous cursos a ANPA chegou ante o Servizo Territorial de Inspección Educativa por problemas moi graves no centro. Quizais sen esta oportunidade de ter xa unha asociación que nos representa as familias non tivésemos esa forza de forma individual para reclamar e denunciar os problemas existentes no instituto», lembra a directiva. «Se miramos á ANPA como a asociación que canaliza as demandas e inquietudes das familias, esta é directamente o único xeito que temos de participar no centro educativo onde pasarán uns cantos anos da súa mocidade os nosos fillos e fillas», conclúen. A directiva saínte lembra que, segundo os estatutos, necesítanse soamente tres persoas para os cargos de presidencia, secretaría e tesourería. E se non se produce a substitución, cando se promova unha ANPA será necesario unha longa tramitación burocrática.