Brodziansky agarda facer unha gran parella de baile co checo Balvin na pintura do Obradoiro

Vladimir Brodziansky xa adestra con normalidade ante a atenta mirada de Félix Alonso, que poderá contar co internacional eslovaco este sábado en Sar fronte ao Valladolid. Será o regreso do á-pivote, que durante dúas tempadas defendeu na ACB a camiseta do conxunto compostelán. O 10, que repetirá número no seu dorsal, volverá á caldeira para, como el mesmo sinala, axudar a subir o equipo á máxima categoría do baloncesto español, un privilexio que perderon os santiagueses para mediados de maio do pasado ano.

Precisamente foi o Joventut de Brodziansky o último rival do Obra na liga Endesa. Aquela contundente vitoria do conxunto entón adestrado por Moncho Fernández (97-71) non foi suficiente para lograr a permanencia. De nada serviron os 19 puntos de Marek Blazevic e de Devon Dotson, os 15 de Thomas Scrubb ou os 13 de Artem Pustovyi. A mirada dos 5.600 afeccionados que encheron o recinto acabou con bágoas nos ollos. Aquel día en Sar, vestido de verde estaba Brodziansky defendendo as cores do equipo de Badalona. Foi testemuña en primeira persoa do dramático descenso do colectivo da capital galega á Primeira FEB. Agora retorna para devolver ao quinteto compostelán de novo á elite.

Brodziansky confesa as verdadeiras razóns polas que aceptou a oferta do Obra, cando amais da mesa tiña o interese de equipos da ACB, como Breogán, Coruña e Lleida: «Comecei a miña carreira profesional aquí, en Sar, co Obradoiro. Sempre me atopei moi cómodo en Santiago e por iso aceptei vir. Pedíronme axuda para intentar acadar os obxectivos e volver á ACB con este equipo. É o grande obxectivo que temos», explica o eslovaco. Ademais, subliña que en Santiago sempre lle foron moi ben as cousas: «Gardo moi bos recordos desta cidade e deste club. Fixemos unha boa tempada no meu primeiro ano. A campaña seguinte foi a do covid e todo foi un pouco máis complicado».

A á-pivote xa ten ganas de debutar. Empezou a adestrarse este martes cos seus novos compañeiros e terá os seus primeiros minutos este sábado fronte ao Valladolid, pois vén nun excelente estado de forma tras xogar toda a primeira volta na máxima categoría co Murcia. Destaca que se atopou «un bo vestiario, con moi bos xogadores. Estou aquí para axudar no que o adestrador me pida, para facer un Obradoiro mellor de aquí a final de tempada».

Xogar de «catro»

Explica que a súa posición principal é «a do catro, aínda que podo axudar a Ondrej Balvin no cinco e pediume o técnico que había que aproveitar o meu tiro desde o tres, pero fundamentalmente veño para o catro». Aínda que non xogou no Primeira FEB, Brodziansky recoñece que é «unha categoría con moitísimo nivel, con exequipos de ACB, como Burgos, Estudantes e Fuenlabrada, que son os que están arriba na clasificación. Veño ao Primeira FEB, pero para min é un gran reto pelexar polo ascenso co Obradoiro».

Outro dos bos recordos do seu paso por Santiago céntrase na implicación do público co equipo: «Sempre estiven moi a gusto e encántame a afección que ten o Obradoiro. O equipo recibe en cada partido que xoga na casa o máximo apoio desde a bancada».

Tres visitas o Sar

Brodziansky xogou durante dous anos consecutivos en Sar, desde o 2018 ao 2020. Disputou un total de 57 encontros na ACB co equipo compostelán, antes de facer as maletas para asinar co Joventut de Badalona.

Debutou na liga Endesa na tempada 2018-19, en Sar, nun Obra-Burgos, encontro que finalizou con triunfo local por 91-81. O 10 do Obra culminou a súa primeira actuación con oito puntos e oito rebotes en vinte minutos. O seu último partido como obradoirista foi antes do desexado e agardado, pois o disputou nunha tempada reducida polo covid.

A súa achega final ao equipo foi en Bilbao, nun partido que perderon os galegos por 99-72. Brodziansky e Vasileiadis foron os máximos anotadores do encontro, con 18 puntos por cabeza. O eslovaco asinou 3 canastras de 4 ensaios e 4 de 5 triplos, ademais de dous rebotes e 17 valoración.

Despedida

Curiosamente, na súa despedida co Obra tivo que verllas na pintura co pivote co que hoxe comparte vestiario. Balvin defendía a camiseta do Bilbao Basket nese momento, o mesmo que outro dos seus novos compañeiros, o balear Tomeu Rigo.

Tras a súa marcha, Brodziansky regresou o Sar tres veces como visitante nas catro campañas que xogou no Joventut. No curso 2022-23 non viaxou á capital galega por estar lesionado. A súa primeira visita como forasteiro foi no campionato 2020-21, con vitoria dos cataláns por 83-87. Anotou 13 puntos en 22 minutos de xogo, con 9 de 10 tiros libres, cinco rebotes e 19 de valoración.

No campionato seguinte, o triunfo foi para os composteláns por 93-91. Brodziansky converteu 18 puntos en 25 minutos, con 5 canastras de 8 intentos, 5 de 7 tiros libres, 7 rebotes e 20 créditos de valoración. O seu terceiro desprazamento a Santiago acabou co doloroso descenso do equipo galego á Primeira FEB. Ese día, o eslovaco anotou cinco puntos en case 17 minutos de xogo.

Catro vitorias de seis

Tras a súa marcha da capital galega, Brodziansky enfrontouse en seis ocasións ao colectivo obradoirista. Perdeu dous encontros por lesión. Dos seis xogados, a á-pivote gañou catro.

---

---

---