A comunidade de montes de Seixo e Val propoñen ao Concello que lles ceda os terreos
01 abr 2024 . Actualizado á 05:00 h.Hai dous anos que o concello ourensán de Gomesende (667 veciños) quedou sen bar. Este baleiro social levou a un grupo de veciños a porse ao choio para recuperar unha vivenda e convertela nun establecemento hostaleiro e lugar de reunión para dar cabida a todos aqueles que non atopan un espazo para atoparse, falar e socializar.
Os membros da comunidade de montes de Seixo e Val acaban de dar un primeiro paso. Tras convocar unha reunión, na que participaron varios veciños, decidiron propor ao Concello que lles ceda os terreos que os que hoxe se atopa un campo de fútbol e a que foi a casa do médico, que están en desuso, para montar alí un local social e un bar. Óscar Pereira Soto é o presidente da comunidade de montes e promotor da iniciativa. «Na reunión se decidió que podríamos, con fondos propios, terminar la casa del médico, donde faltan las ventanas, y hacer ahí un bar y un centro social de reunión», resume.
Os veciños sinalan que, ademais de que o sitio é bo, a comunidade de montes ten o diñeiro necesario para obrar no inmoble e que o único que necesitan é que o Concello lles ceda a vivenda. «Ou Concello non tería ningún gasto. Para o pobo sería moi bo, xa que levamos dous anos sen un lugar de reunión, sen que a xente maior poida ler, tomar un café ou falar. Non existen lugares para socializar». O presidente da comunidade de montes reuniuse con alcaldesa, Pura Rodríguez, para solicitar a cesión do inmoble que, en principio, non será viable.
A rexedora, que tamén está implicada no labor de dotar ao municipio cun lugar de reunión, sinala que desde a Consistorial barallan a posibilidade de converter un local do multiusos nun bar, tras adaptalo, xa que non está acondicionado para albergar un establecemento destas características. Sería viable aínda que, como sinala tanto a alcaldesa como os veciños, levaría un tempo polo en marcha porque serían necesarios varios trámites administrativos, entre eles sacar a concurso a explotación do bar.
Pura Rodríguez sinala que a intención do Concello é converter a antiga casa do médico nunha vivenda social, aínda que non descarta por completo a cesión aos comuneiros. «Cando en Gomesende pechou o último bar, intentamos mediar para que alguén o alugase, pero non foi posible. A decisión que tomamos entón foi adaptar unha parte do multiusos. O importante é que sexa un lugar que estea aberto sempre, que haxa unha persoa á fronte e que os veciños non o atopen un día aberto e outro pechado», explica a alcaldesa.