O certame ciclista terá paradas na Merca, Xinzo de Limia, Ramirás, Quintela de Leirado e A Arnoia
15 mar 2025 . Actualizado á 05:00 h.Unha carreira de ciclismo todo terreo incorporarase ao calendario provincial, disputándose entre o 11 de maio e o 29 de xuño próximos, como foi dado a coñecer na presentación do evento na Deputación de Ourense.
A proba ciclista celebrarase en cinco localidades da provincia, co obxectivo de impulsar o deporte e promocionar diversos puntos da xeografía ourensá. O deputado de Cultura e Deporte, César Fernández, participou nese acto protocolario, no que tamén estivo representado o Club Ciclista Resistencia Ourense, encargado da organización dos circuítos que terán entre 5 e 7 quilómetros de percorrido e que se realizará durante tres horas.
A competición contará coa colaboración dos concellos por onde pasará a proba e tamén estiveron presentes alcaldes e representantes municipais que a apoiarán. E é que a BTT Resistencia Deputación ten fixado o seu itinerario conforme esta orde: A Merca, o 11 de maio; Xinzo de Limia, o 25 de maio; Ramirás, o 8 de xuño; Quintela de Leirado, o 22 de xuño e, para rematar, A Arnoia, o 29 de xuño.
Deste xeito, a Deputación pretende fomentar a práctica do ciclismo, ademais de promocionar a súa provincia, en destinos con notables atractivos para a práctica do deporte e o turismo.