O raro material, descuberto por primeira vez en Galicia, exponse no museo de xeoloxía de Quiroga e o centro de interpretación das covas de Meiraos
18 abr 2025 . Actualizado á 05:00 h.O centro da interpretación das covas de Meiraos —no municipio de Folgoso do Courel— e o museo de xeoloxía e paleontoloxía de Quiroga xa incorporaron aos seus fondos unhas mostras de leite de lúa, unha rara formación mineral que foi descuberta recentemente na cova de Aradelas, no primeiro destes concellos. Leste o único lugar de Galicia no que rexistrou ata o de agora a presenza deste material, que se encadra na categoría dos espeleotemas, á que tamén pertencen as estalactitas, as estalagmitas e outros depósitos minerais presentes nas covas calcarias.
A diferenza dos demais espeleotemas, que son materiais sólidos, o leite de lúa —máis coñecida polo seu nome inglés de moonmilk— presenta unha consistencia branda e pastosa. Por este motivo, as mostras que se expoñen en Folgoso do Courel e Quiroga están gardadas en envases de cristal. A que se exhibe no museo quirogués pode verse nunha vitrina que contén tamén varias mostras de estalagmitas recollidas en covas do geoparque Montañas do Courel.
O leite de lúa descuberta na cova de Aradelas, ademais, ofrece a particularidade de estar composta por dous minerais, a hidromagnesita e a huntita, que non se atoparan ata o de agora no territorio galego. O material foi achado polos espeleólogos de varios clubs galegos e asturianos que levaron a cabo o ano pasado unha intensa exploración da gruta, na que se descubriu un lago subterráneo de augas cor turquesa. Outra mostra deste material foi cedida o pasado febreiro ao Museo de Historia Natural da Universidade de Santiago co fin de que tamén se mostre ao público neste centro.