Os vigueses pasaron de ter que vivir co balón para estar cómodos en bloque baixo, sen gañar a posesión e reducindo as ocasións dos rivais
22 dic 2025 . Actualizado á 05:00 h.Houbo un tempo, non demasiado afastado, no que resultaba imposible imaxinar que o Celta fose capaz de sumar puntos sen ter a posesión do balón, sen vivir en campo contrario e sen xerar un bo puñado de oportunidades, o que tamén deixaba espazos ás costas para recibilas. Con todo, nos dous últimos meses, o xiro cara ao practicismo foi radical: os vigueses xa se senten ben en bloque medio ou baixo, aprenderon a xogar sen o balón e a perder, como norma, a posesión e aínda que iso implique menos chegadas á área rival, tamén significa que os adversarios lles xeran menos oportunidades. De feito, os celestes chegan ao parón de Nadal con 19 goles en contra en 17 partidos, a cantidade máis baixa desde o regreso a Primeira, calcando os mesmos 19 da 2014/2015 con Berizzo. Os de Giráldez son o quinto equipo menos goleado.
«Creo que estamos máis sólidos en moitas cousas dos partidos agora. Temos que ser máis pragmáticos e entender que cando non estamos ben, somos capaces de competir. Esa parte gústame do equipo», comentou Claudio Giráldez sobre os novos camiños do equipo nunha das súas comparecencias.
A POSICIÓN
O centro do campo como localización máis avanzada
A foto fixa do partido co Oviedo indica que Bryan Zaragoza era o xogador máis adiantado do Celta e o único futbolista máis aló do centro do campo. Todos os demais formaban desde a divisoria ata a frontal da área onde se situaba a zona defensiva dos celestes. Coas liñas xuntas, aínda que tamén con buracos que tapar, como os centros laterais, por onde fixo dano o rival. Ese posicionamento, que xa apareceu noutros partidos recentes, nada ten que ver co equipo que presionaba case á altura da área rival, un costume que seguramente volva pór en práctica o equipo noutros momentos.
A POSESIÓN
O Celta aprendeu a vivir sen o balón
Para gañar, o Celta debía ter o balón. Era unha máxima que se cumpría ata que o equipo descubriu que tamén se pode gañar desde a sobriedade defensiva e o contragolpe, unha arma que sempre se lle deu ben ao conxunto vigués. Esta mesma tempada, o Celta comezou cun 69,1% de posesión ante o Xetafe, partido que rematou perdendo, e con todo despois foi capaz de gañar no Sadar cun 38% de balón. En catro dos cinco últimos partidos nos que foi capaz de manter a portería a cero, nunca gañou a posesión: 48,4% ante o Alavés, 42,4% no Bernabéu, un 49 co Athletic e un 44,4% no empate do Tartiere. Curiosamente, a última vez que tivo máis o balón que o seu rival en liga, ante o Espanyol un 60,5%, rematou perdendo cun gol de estratexia ao fío do desconto. O único tanto que recibiu a escuadra viguesa no últimos cinco partidos.
TIROS CONCEDIDOS
Salvo o Madrid, ningún rival das cinco últimas xornadas pasou de tres tiros entre paus
O Celta cortou a sangría de goles dun modo radical. Tomando como referencia os cinco últimos partidos de liga, o Real Madrid foi o único equipo capaz de tirar entre os tres paus máis de tres veces. Os brancos probaron a Ionut Andrei Radu en sete ocasiones, pero todo os demais rivais —Athletic, Espanyol e Alavés— quedaron en dous e o Oviedo tivo tres por estatística, aínda que nunca transmitiu a impresión real de crear perigo.
EN ATAQUE
Os célticos manteñen unha produción similar de cara ao marco contrario
Oviedo foi un claro exemplo dun mal día sen balón e con pouca chegada do Celta, pero aínda así os vigueses gozaron das ocasións máis claras. A estatística di que tiraron dúas veces a porta, o mesmo que ante o Athletic Club, que resultaron ser os dous goles do triunfo. No Bernabéu, foron capaces de efectuar cinco disparos. O seu mellor rexistro da campaña foi ante o Xirona: sete disparos para un gol.