«Non estamos para tres competicións», di o técnico do Celta tras a derrota en Copa fronte ao Albacete
17 dic 2025 . Actualizado á 23:41 h.O adestrador do Celta, Claudio Giráldez, sinalou tras a eliminación de Copa que no equipo están «enfadados» despois de facer «todo» o que estaba na súa man «para pasar de rolda». Lamenta o porriñés que non están «para xogar tres competicións», máxime coas baixas que tiñan para esta cita, con varios futbolistas con gripe —tres que non viaxaron e ningúns máis que si, sinalara na previa— aínda que insiste en que non quere que pareza unha escusa. «Hai xogadores chorando no vestiario —revelaba—, o equipo intentouno».
Na súa análise do choque fronte ao Albacete, admite Giráldez que lles faltou enerxía no primeiro acto e que o primeiro gol que encaixan é «imperdoable», pero valora que logo melloraron e atacaron, sobre todo, no segundo acto, sendo «verticais» e logrando darlle a volta ao marcador cos goles de Yoel Lago e Borja Iglesias. Pero atopáronse o contratempo inesperado da lesión de Borja Iglesias, que saíra como refresco.
Considera o preparador céltico que tiveron «demasiado tempo ao Albacete» na súa liña nos minutos finais, mentres que na prórroga estiveron mellor que os de Alberto González. Con todo, víronse abocados a uns penaltis onde o desacerto foi total, tanto por parte dos lanzadores visitantes como do seu porteiro. «Saíunos cruz», expresa sobre a quenda. Pero tamén cre que viñan condicionados polo golpe anímico que lles supuxo o 2-2 aos 93 minutos, cando parecía que xa tiñan o billete para oitavos na súa man. «Tócanos repornos», indica xa coa vista posta no duelo ante o Oviedo do sábado.
Non quita mérito ao rival, un Albacete do que eloxia que defendeu «moi ben». «Os nosos centrais estiveron incómodos en todo momento. Previamos un bloque medio e non nolo permitiron. Alberto (González) estivo acertado na súa formulación e felicítolles», apunta. Cre que o nivel de Primeira e Segundo é parello e «se non vas ao 200%, non gañas».
