Borja Iglesias sufriu un espasmo nun costado, un considerable dano colateral para o Celta
BANCADA DE RÍO
A prórroga permitiu a substitución do dianteiro céltico cando xa levaba un bo intre mermado fisicamente
18 dic 2025 . Actualizado á 05:00 h.A eliminación da Copa do Rey a mans dunha Segunda División, o Albacete, non foi o único negativo da noite no Carlos Belmonte, senón que o Celta regresa a Vigo con Borja Iglesias tocado. O compostelán sufriu un espasmo muscular nun costado e está por ver se estará dispoñible na última cita do ano, en Oviedo; unha baixa de consideración tendo en conta que é o xogador máis diferencial nesta primeira parte do campionato.
Borja Iglesias entrou tras o descanso e cambiou por completo o partido. Marcou dous goles, un deles, anulado, provocou un xiro radical no xogo do Celta e no partido. Pero poucos minutos despois de anota o 1-2, comezou a sentir molestias nun costado. Foise á zona de bancos e foi tratado polos fisios. Volveu ao campo, pero apenas podía correr nun balón longo polo que intentou saltar, volveu resentirse e acabou tendido no chan. De novo, entraron as asistencias e puido acabar os 90 minutos a duras penas, trotando sobre o campo e intentando estorbar ao rival.
No receso entre o fin do tempo regulamentario e a prórroga, Claudio Giráldez relevouno aproveitando que tiña a opción dunha sexta substitución, e foi a quenda dun Ferran Jutglà que viña de haber disputado a primeira metade fronte ao Athletic Club o domingo en Balaídos. Era imposible que o compostelán puidese seguir sobre o terreo de xogo.
Agora, con pouco máis de dous días para o próximo partido -en en Carlos Tartiere fronte ao Oviedo para dar por finalizado o 2025 competitivo- toca agardar acontecementos. Se Borja Iglesias -que xa se viña resentindo doutras molestias, no xeonllo por un golpe no anterior duelo de Copa- non está en condicións, e con Pablo Durán lesionado, Ferran Jutglà preséntase como a única alternativa.
