Narón, capital do baile con homenaxe ás campioas do mundo: «Un orgullo para todos»
NARÓN
O pavillón da Gándara acolleu hoxe o trofeo Cidade de Narón, con máis de 300 bailaríns chegados de toda España
07 abr 2024 . Actualizado á 19:51 h.Narón vive un dos seus momentos máis doces no baile. Os seus equipos Narón Kids (do Club Baile Deportivo Narón) e Revolution UPA ( dUn Paso Adiante) acaban de alzarse como campións do mundo absoluto e youth, respectivamente. Ambos recibían o recoñecemento onte do Concello e de todo o público durante o Trofeo de Baile Deportivo Cidade de Narón, cuxa edición número 33 foi disputada no pavillón municipal da Gándara. Segundo a alcaldesa Marián Ferreiro, «sodes un orgullo para todos».
O campionato do mundo disputouse en Cambrils, e o torneo de onte foi o mellor colofón a estas vitorias. Pola Gándara pasaron máis de 300 bailaríns de toda España. E á convocatoria tamén asistiron o concelleiro de Deportes, Ibán Santalla; o portavoz do PP, Germán Castrillón; a do PSOE, Silvia de Arriba; e a concelleiro do BNG, Beatriz Mosquera. Segundo a rexedora, «Narón Kids e Revolution UPA son un exemplo a seguir de esforzo, traballo, constancia e dedicación; un orgullo para a nosa cidade e tamén para vos vosos respectivos concellos».
Ferreiro tamén lles desexou que «ogallá manteñades non tempo ese liderado para que todas e todos nós poidamos seguir desfrutando do baile deportivo ao máximo nivel, viviremos vos vosos futuros éxitos coa máxima ilusión e orgullo de todas as naronesas e naroneses». As campioas recibiron ramos de flores e unha medalla en madeira para cada unha coa inscrición: «Parabéns por formar parte do equipo campión do mundo de danza coreográfica».
A alcaldesa tamén lles entregou unha réplica da escultura Anduriña, realizada polo famoso artista Manuel Patinha. O torneo de baile celebrado onte na Gándara estaba organizado polo Concello de Narón xunto co Club Baile Deportivo Narón, coa asistencia de numeroso público.