Mercadona acadou os 1.879 millóns en compras a provedores galegos no 2024

Mercadona pechou o pasado exercicio 2024 cunhas compras por importe de 1.879 millóns de euros a provedores galegos, unha cifra que crece un 3,8% sobre o ano anterior. Son 53 provedores de produto, aos que suman outros 446 non comerciais e de servizos. Nesta oferta con selo da comunidade figuran 6.000 toneladas de capturas de pesca extractiva da costa galega, destacando polo seu alto volume pixota, lirio, cabala e xurelo. En canto a outros produtos, a compaña comprou 115 millóns de litros de leite o pasado ano, así como 8,7 millóns de quilos de mexillóns frescos, 290.000 unidades de pementos de variedade Padrón, 400 toneladas de patacas e máis de 1,8 millóns de botellas de viños galegos. Entre outros subministradores, Delicias Coruña cociñou máis de 23,7 millóns de empanadas para a compaña valenciana. Son «cifras todas elas que reflicten, ademais, a aposta decidida de Mercadona polo sector agroalimentario de Galicia», subliña a compaña.

Pola súa banda, o investimento na súa rede de supermercados galegos acadou os 24 millóns de euros, para a mellora de tendas e a implantación da súa nova sección Listo para comer (dispoñible en 49 establecementos), cunha variedade duns 40 pratos que inclúen desde entrantes e aperitivos como croquetas ou ensalada rusa a arroces, pasta, hamburguesas e bocadillos. Mercadona pechou o exercicio con 62 supermercados, 55 cualificados como eficientes e 47 con puntos de carga de vehículos eléctricos. Durante o 2024 abriu tres tendas, pechou dúas por non acadar os estándares de calidade requiridos, e mellorou unha vintena delas.

Un persoal que crece

En paralelo, Mercadona destaca o seu compromiso polo emprego estable e de calidade, creando 240 novos postos que elevan o seu persoal en Galicia ás 3.016 persoas. Traballadores cun salario por amais da media do sector, cun mínimo bruto de entrada de 1.685 euros mensuais, que chegan aos 2.280 con máis de catro anos de antigüidade, apostando polo crecemento persoal e laboral do equipo.

Sinalan, ademais, desde a compaña que, dentro do seu plan de acción social, no último ano doaron, a través de diferentes iniciativas, 1.184 toneladas de produtos de primeira necesidade na comunidade. Os beneficiarios foron os colectivos máis vulnerables, cun traballo realizado para ampliar a súa rede de colaboración con entidades sociais. Ao peche do 2024, eran 41 os colectivos cos que estaba implicada Mercadona, o que mellorou notablemente a vertebración da axuda que ofrece a empresa de supermercados e venda en liña.

Mariña Rivas, directora de relacións institucionais de Mercadona en Galicia, conclúe que son datos que reflicten tanto o compromiso da empresa co sector agroalimentario galego como a axuda que aguzosa a distintas entidades sociais, así como unhas melloras na súa rede de establecementos «evidentes para os nosos clientes, que seguen confiando en nós, pero tamén para as máis de 3.000 persoas que traballamos en Mercadona na nosa comunidade».

A empresa que preside Juan Roig pechou o ano 2024 cunha facturación de 38.835 millóns de euros, dos que 1.778 millóns corresponden á súa cifra de negocio en Portugal, que achega 60 tendas do total de 1.674 supermercados que conformaban a súa rede ao peche do exercicio. Acada os 110.000 traballadores na península ibérica, tras crear 6.000 novos postos no exercicio, un 2024 que supuxo para a compaña o mellor dato histórico de rendibilidade: tras crecer un 37%, rexistrou 1.384 millóns de euros de beneficio neto. Deles, a compaña sinala que destinou a dividendos o 20% (275 millóns), mentres reinvestiu o 80% restante (1.109 millóns de euros).

---

---

---