Galicia despide con outro dobrete o Campionato de Europa de piragüismo en distancia maratón
DEPORTES
Jaime Duro e Óscar Graña colgáronse a prata na final do C2 Sénior, con Tono Campos e Diego Romero, bronce
08 jun 2025 . Actualizado á 21:06 h.O piragüismo galego completou as catro xornadas do Campionato de Europa de Maratón logrando o que poucos países son capaces de conseguir: sumar medallas en cada un dos días de competición. E de facelo incluso con máis dun dobrete. Como o que onte protagonizaron as dúas parellas do C2 Sénior que representaban á selección española, a formada polos pontevedreses Jaime Duro (Escola de Piragüismo Ciudad de Pontevedra) e Óscar Graña (Kaiak Tudense) e os arousáns Tono Campos e Diego Romero (Breogán do Grove). Os dous primeiros colgáronse a prata e os seus camaradas de equipo o bronce nas augas da localidade portuguesa de Ponte de Lima.
Nunha proba de 22,60 quilómetros, os lusos Rui Lacerda e Ricardo Coelho alegraron o día á afección local. Fixérono, ademais, impóndose con suma autoridade, cun crono de 1 hora, 40 minutos, 37 segundos e 32 centésimas e moito, moito tempo para celebrar a vitoria na súa entrada en meta. Un minuto e 24 segundos houbo que agardar para ver cruzar ao barco de Jaime Duro e Óscar Graña (1.42.02,01), e 3 minutos e 18 segundos para a conclusión da regata de Tono Campos e Diego Romero (1.43.55,53). Os polacos Mateusz Zuchora e Mateusz Borgiel foron cuartos, xa a máis de cinco minutos dos campións.
O outro galego en acción na xornada de clausura do Campionato de Europa, o tudense do Club Piragüismo As Torres-Romaría Viquinga Iván Alonso, concluíu xunto a Adrián Martín (Escola Piragüismo Aranxuez) noveno na última final do programa, a do K2 Sénior Masculino.
Nove medallas galegas
A selección española finalizou o Campionato de Europa de Maratón de piragüismo con 13 metais, tres de ouro, dous de prata e oito de bronce, e o terceiro posto no medalleiro por países, só superado pola superpotencia do deporte da pa, Hungría, e pola anfitrioa Portugal. E dous de cada tres podios hispanos levaron a firma de padeeiros galegos. Con tres nomes propios.
O pontevedrés Jaime Duro arrincou o xoves a cita continental conquistando o título de mellor canoísta sénior da modalidade curta do piragüismo de fondo, sumando onte a prata no C2 da distancia estándar. Héctor Vázquez, do Fluvial de Lugo, axenciábase o xoves a prata no C1 Júnior e un día despois o ouro no C2 Júnior, nesta proba, á vez do breoganista Jaser Silva. E O terceiro galego destacado, un ano máis, foi Tono Campos. O grovense revalidou o sábado o título do C1 Sénior da distancia estándar antes de facerse onte co bronce na final do C2, elevando a sete os seus títulos individuais no Europeo, a 18 as súas medallas na cita continental e a 46 os podios nos grandes campionatos internacionais de seleccións.
Ademais dos anteriores, houbo outros tres bronces galaicos: o de Álex Barreiro e Mateo Lago (EPC Pontevedra) en C2 Júnior, o de Izan Aliaga (As Torres-Romaría Viquinga) en K1 Sub-23 e o do compañeiro de club deste último Fernando Busto en C1 Sénior.