Coroa de prata que vale ouro para o Baxi Ferrol tras caer fronte ao ESBVA francés (84-70) na final da Eurocup

Coroa de prata para un Baxi Ferrol que vale ouro. O epílogo dez ao conto das mosqueteiras de Lino López non puido ser, pero o cadro ferrolán xa gañara antes de xogarse a volta da final da Eurocup Women e caer (84-70) fronte ao ESBVA galo. O equipo, que só a última hora reuniu o financiamento necesario para participar no torneo é subcampión europeo e equipo revelación da competición. O ambiente asfixiante do Palacium, os nervios e o poderío físico francés puxeron as cousas moi difíciles ás ferrolás, que aínda así deron a cara ata o asubío final. Máis aló do electrónico, as copas que alzará unha cidade envorcada co seu equipo valen case como a copa continental en si mesma.

Coroa de prata que vale ouro para o Baxi Ferrol tras caer fronte ao ESBVA francés (84-70) na final da Eurocup

Elba da Barreira

Espectáculo de luz e cor francesa, con ánimo de cegar as ganas dun Baxi que saltou ao parqué coa premisa do comandante Lino de ser equipo. Salto inicial e unha xogada de tres puntos como elemento desequilibrante na balanza. Arrincou a cousa con posesión errada para o Baxi e o ESBVA golpeou primeiro. Fraqueaban as pernas ás mosqueteiras e Heriaud abriu fenda cun triplo desde case a divisoria. Respondía Joiner estreando o marcador visitante e Zellous, que se convertería no peor pesadelo visitante, facía o propio.

Así vos contamos a histórica final da Eurocup Women entre o Baxi Ferrol e o ESBVA

La Voz

Pintaban bastos e entre Millán e Joiner repartíanse os galóns para silenciar momentaneamente ás galas (13-9). Con posibilidade de tiro ameazaba e xa Mataix, que era o reflexo de que o partido xogaban as ferrolás contra o ESBVA e os seus nervios. Cinco abaixo ao peche do primeiro cuarto, oito no global da eliminatoria, para un Baxi necesitado de non deixar que o escenario embazase as súas capacidades.

Máis seguras no segundo cuarto, co debe de quitarse o corpiño opresor en ataque, intentaba alentar a marea desprazada ás mosqueteiras. O guion empeñábase en levarlle a contraria ao Baxi, con nove abaixo e a eliminatoria complicándose. Exercían Pospisilovà e Joiner de bálsamo calmante e predicaban co exemplo de dicirlles ás súas que, por moi flan que se sentisen, isto ía de baloncesto e as súas credenciais estaban máis que demostrados.

O «1x1» das mosqueteiras do Baxi Ferrol na derrota na volta da final da Eurocup

La Voz

 Leite abría fenda ata os dez de desvantaxe, a festa estalaba entre a parroquia local e tivo que saír Jori Davis a impor o seu baloncesto da experiencia (36-24). Trece abaixo no global da final e a impotencia como novo rival a desterrar polas de Lino López no Palacium galo. Un triplo de Zellous, tiña que ser ela, deixaba a final nun complicado 42-30 ao descanso. 

Sacar músculo

Non lle quedaba outra ao Baxi Ferrol que sacar músculo na segunda metade para tratar de pelexalo ata o final e meterlle, polo menos, o medo no corpo ás galas. Máis axustado (24-20) foi o terceiro cuarto e con dezaseis de desvantaxe, as mosqueteiras tiñan dez minutos por diante para marcharse a casa satisfeitas e cunha última homenaxe europea.

O físico, o que decidiu a balanza para o ESBVA ante o Baxi Ferrol

MIGUEL MASEDA

 Desesperábase Lino López ante o que entendía como falta en ataque de Leite e vía a técnica o preparador. Trece abaixo e tres minutos por diante, co equipo desquitándose no tenteo dos últimos dez (18-20) e Pospisilovà (19 de anotación) como capitanísima da resistencia ferrolá, que culminou coa posibilidade da cadete Elena Baldonedo de saltar ao pista nunha final europea. O Baxi pode celebrar que Ferrol e o baloncesto xa gañaron, a súa prata europea vale ouro.

---

---

---