O proxecto, que une música e gastronomía, percorrerá Ourense
30 abr 2025 . Actualizado á 19:26 h.Os concertos do Xacobeo sumarán neste 2025 unha nova proposta. Esta desenvolverase en Ourense e chega con varias premisas que marcarán o seu futuro: non será un festival dun día —ou unha fin de semana—, maridará música e gastronomía e desenvolverase en clave territorial, con catro datas noutros tantos espazos da provincia. A primeira será o 12 de xullo, e a última, e prato forte da primeira edición, celebrarase o 11 de outubro no pavillón Paco Paz de Ourense, co mítico grupo Jethro Tull como protagonista e encargado de clausurar o festival.
O OU Yeah! 2025 é unha iniciativa das empresas Escena Sonora e Thinking Up Events que conta co patrocinio da Xunta de Galicia —a través de Turismo—, Deputación de Ourense e Concello de Xinzo, e a colaboración do Concello de Celanova, entre outros.
De The Waterboys a Sés
O novo certame musical galego presentouse no mosteiro de Oseira, en Cea, e, desde a organización, José Freiría (Escena Sonora) definiu a filosofía da proposta: «O festival está dedicado ao rock porque é a máxima expresión cultural do século XX».
Para a primeira edición apostouse por un programa que combina grupos internacionais de recoñecida traxectoria con bandas españolas e unha representación destacada de nomes galegos consolidados e emerxentes. A primeira das catro citas será o 12 de xullo en Expourense e nela contarase coa presenza de The Waterboys, Morgan, Escoitando Elefantes —que interpretou varios temas en Oseira— e Tesouro —a banda ourensá liderada por Carlos Rego, ex de Colleita Vermella e Burgas Beat—.
O 23 de agosto, o protagonismo será para Sés, e o escenario, o claustro barroco do mosteiro de Celanova. Uns días despois, o 6 de setembro, o OU Yeah! trasladarase a Xinzo. Na capital da Limia —na Alameda do Toural— actuarán A Garda e Cuarto Vudú —a banda local que lidera José Freiría—.
A última cita do festival ourensán desenvolverase o 11 de outubro no pavillón Paco Paz de Ourense. Será o momento de vivir intensamente unha sesión de clausura a cargo de Jethro Tull.
A gastronomía xogará un papel destacado en todas as citas e será responsabilidade dos membros do colectivo Cociña Ourense. Dous deles, Begoña Vázquez e Gerson Iglesias, estiveron a traballar en directo na presentación de Oseira.
O responsable de Turismo, Xosé Merelles, destacou a idoneidade do proxecto na súa aposta polo territorio e o patrimonio, lembrou que a Xunta é pioneira na implicación cos festivais como reclamo turístico e que se organizan 70 concertos ao ano vinculados ao Xacobeo.