En liberdade provisoria o veciño de Fisterra investigado polo atropelo mortal de Cee
FISTERRA
O fiscal non solicitou o seu ingreso en prisión, polo que a xuíza de Corcubión que leva esta causa non o puido decretar. A Garda Civil confirma que o sospeitoso carece de permiso en vigor pola perda total de puntos
08 oct 2025 . Actualizado á 14:51 h.Un veciño de Fisterra, M.E.D., de 38 anos de idade, pasou a disposición xudicial este martes ao mediodía. Está investigado polo atropelo ocorrido na noite deste domingo en Cee, nas proximidades do termo municipal de Corcubión, contratempo no que resultou falecido José Antonio Pombo Graíño, de 56 anos. O suposto condutor do BMW berlina, de cor azul mariño, que impactou contra o transeúnte foi trasladado desde os calabozos do cuartel de Carballo por dous axentes de Tráfico da Garda Civil para prestar declaración perante o xulgado número 2 corcubionés. O Grupo de Investigación e Atestados de Tráfico (GIAT) da Coruña relaciona a este fisterrán cun delito de homicidio por imprudencia e un segundo de denegación de auxilio.
A última hora da mañá deste mesmo martes, a xuíza do Tribunal de Instancia de Corcubión, praza número 2, acordou a posta en liberdade do detido (o fiscal non solicitou o seu ingreso en prisión, polo que a xuíza non o pode decretar), segundo confirmaron fontes xudiciais. Como medidas, impúxolle a obrigación de comparecer os días 1 e 15 de cada mes, a privación do permiso de conducir ata que finalice o procedemento e a retención do pasaporte. Está investigado por homicidio por imprudencia e abandono do lugar do accidente.
A Garda Civil confirma que o sospeitoso carece ademais de permiso en vigor pola perda total de puntos, polo que lle atribúe un terceiro delito, contra a seguridade viaria.