Insisten en que se habilite unha base permanente do Servizo de Vixilancia Aduaneira na Costa da Morte
CARBALLO
O deputado autonómico do BNG na Costa da Morte, Óscar Insua, reclama a implantación deste servizo
28 sep 2025 . Actualizado á 04:50 h.Primeiro foron os alcaldes e alcaldesas da Costa da Morte os encargados de reclamar ao Goberno central unha base operativa permanente do Servizo de Vixilancia Aduaneira na comarca, con emprazamento prioritario para Muxía.
Agora é o deputado do BNG pola Costa da Morte, Óscar Insua, o que se suma a esta demanda. Fíxoo tras presentar iniciativas ante o Parlamento galego nas que solicita á Xunta que inste a Madrid a crear un posto permanente, con medios humanos e técnicos na zona. «Cuestión esta última, que xa vén demandando a formación nacionalista nos últimos meses, con propostas parlamentarias tanto na Cámara galego como no Congreso», apuntou Insua.
O deputado elevou estas propostas despois de manter unha reunión con Henrique del Río Otero, delegado da CIG na AEAT-SVA, e nas que tamén invita á Xunta a que se dirixa ao Goberno central para iniciar negociacións encamiñadas a transferir o Servizo de Vixilancia Aduaneira a Galicia, así como que proceda a autorizar a utilización provisional dás embarcacións incautadas en agosto ao barco Lila Mumbai en Alxeciras para recolocalas en Galicia. «É necesario adoptar medidas inminentes para que a costa galega, e en particular a Costa da Morte, estea ben protexida e vixiada, máxime cando corpos e forzas de seguridade manifestaban recentemente que cren que entran en Galiza ata cinco narcosubmarinos ao mes», xustificou o deputado corcubionés.
Óscar Insua manifestou que «Ribadeo e Muros están sen barcos para saír ao mar. Vilagarcía está sen un deles, e o resto de embarcacións acaban cada dous por tres nos talleres». E engadiu: «Decomisáronse varias lanchas en Xibraltar que se poden destinar a Galiza, e tamén á Costa da Morte, e así imos a pedirllo a Madrid. Non podemos ter máis tempo as costas sen vixilancia como este verán».