En febreiro recuperouse case media tonelada de marisco pescado ilegalmente
07 nov 2025 . Actualizado á 04:46 h.No Grove confían en que a que se aveciña sexa unha boa campaña da centola. En Cambados teñen máis dúbidas: polo que viron ata o de agora quen traballa co boliche e o bou de vara, din desde a confraría, non parece que o crustáceo abunde. O luns, na xornada inaugural da campaña, comezará a verse cal é o estado dun recurso vital para lonxas e que é, historicamente, un dos favoritos dos furtivos que operan na ría. Este ano, ata o 31 de outubro, os servizos que se empregan na loita contra a pesca ilegal comisaran nas rías galegas algo máis dunha tonelada e media deste crustáceo. A cifra cobra valor se a comparamos cos datos do exercicio anterior: no mesmo período de 2024, os comisos desta especie deixaron un total de 827 quilos. É dicir, dobrouse a cantidade de centola interceptada aos furtivos.
A campaña da centola arrinca en novembro e, aínda que se prolonga durante varios meses, o groso das capturas concéntranse na contorna do Nadal. O arranque do 2025 deixou un regueiro de intervencións: entre xaneiro e maio interceptáronse 1.237 quilos deste produto, con cantidades mensuais que oscilaron entre os 124 quilos de marzo e os 461 de febreiro. Os golpes ao furtivismo da centola amortecéronse durante o verán, onde as cantidades recuperadas polos servizos de loita contra a pesca ilegal caeron drasticamente: 72 quilos en xuño, 35 en xullo e 22 en setembro.