O segundo número de «Salghadoiro» revalida o éxito da revista que difunde o talento atlántico
O GROVE
O equipo editorial presenta un volume que desta vez é de pago e levará os seus contidos o xoves a Compostela
14 jul 2025 . Actualizado á 05:00 h.A revista meca Salghadoiro volveu demostrar esta fin de semana o seu tirón, e a deixar patente que dispón de fieis seguidores. O público, arredor dun cento de persoas, abarrotou a Galería Besada, de O Grove, para asistir á presentación e mercar, desta vez, o segundo número da publicación, que concentra o talento creativo existente na costa atlántica galega.
O acto comezaba pasadas ás oito e media da tarde do sábado, coa venda dos primeiros exemplares, cuxo contido foi debullado máis tarde polos integrantes do equipo editorial. Carlos Álvarez, Míriam Barral, Leticia Castro, Víctor Gallego, Andrea Menéndez e Lino Prieto explicaron as razóns da escolla dos protagonistas da revista, subliñando o seu talento e a necesidade de difundilo. Nas súas páxinas destacan tres personaxes con pedigrí grovense: o desaparecido investigador, político e escritor Luís Rei, de quen Lino Prieto fai un extenso relatorio; a actriz Atenea García, cuxa traxectoria reflicte Víctor Gallego, e a artesá Jennifer Martínez, colareira de quinta xeración e incipiente ceramista, que amosa ao seu traballo da man de Leticia Castro. Máis aló do talento local, o equipo cumpre coa premisa de estender os contidos máis alá do Grove.
De feito, a portada do presente número é para Marta Verde, artista dixital de Pontevedra e unha das visualistas con meirande influencia do país, ademais de docente na prestixiosa escola Berklee College of Music de Valencia. Seguindo esa inquedanza de traspasar fronteiras, o equipo viaxou esta vez a Ribeira para coñecer a Fran Millán, de Frouma Atlantic Wood, que fabrica mobles a partir de madeira de batea e tamén ata A Guarda, para descubrir o traballo de Amalia Puga, alma máter de Proxecto Bolina, unha marca que reutiliza as redes de pesca para elaborar pezas de deseño, cosidas polas propias atadoras da zona, neste caso as Redeiras de Atalaia.
No apartado musical, camiñan ata o outro lado da ría para verse con The Rapants, unha das bandas galegas do momento. E pola banda artística, sacan á luz a obra do cambadés Sebas Anxo, cuxa exposición colga nestes intres das paredes da Galería Besada, e amosan o extenso labor como muralista do coruñés, David Brey. Tamén hai espazo para a literatura dende Combarro, da man da poesía de Tamara Andrés, e a revista abre as portas a un espazo creativo singular, o Sanatorio de Pontevedra.
A presentación finalizou no Estudio MardeFondo á outra beira da rúa, con música, petiscos e un bo feedback por parte dos espectadores. Os integrantes da revista salientaron o apoio de Artesanía de Galicia, Bodegas Attis e Finsa para poder levar a cabo este traballo. Salghadoiro presentarase tamén en Santiago, este xoves, 17, ás seis da tarde en Casa RIA.