A emprendedora María Roade inspira a primeira colección da súa marca no mar de Baiona que a viu crecer. É un proxecto empresarial de proximidade que transforma o concepto «vintage» con visión ecolóxica
02 may 2024 . Actualizado ás 00:00 h.María Roade (Baiona, 1986) decidiu cruzar alén do espello cando viu que o que predicaba no seu traballo afastábase demasiado do estilo de vida que en realidade ansiaba. Formada en Publicidade e Relacións Públicas, especializouse en Mercadotecnia Dixital levando contas de destacadas compañas e colaborando con outras como Google. «Atopábame nun proceso consciente de cambio cara á moda sostible, quería aliñar os meus valores persoais coa miña vida profesional e empezaba a cuestionarme todas as implicacións que tiñan os produtos e mensaxes que promovía», sinala a emprendedora. Buscando esa coherencia, non tardou en iniciar o camiño de promover marcas que estivesen facendo un ben á sociedade e ao planeta. «Primeiro, como consumidora de produtos máis sostibles, pero xa no 2018, como xestora. Co meu socio, José Antonio Villa , creamos Fieito.com, unha tenda online de produtos eticosostenibles onde hai máis de 70 referencias, desde moda a cosmética natural, xoguetes, produtos para o fogar, etcétera», conta sobre a súa estrea neste campo cunha empresa que é unha extensión dos seus valores nos que prima o respecto ao medio ambiente e o comercio xusto.
Con esta experiencia, as súas habilidades en mercadotecnia e un período de formación en deseño de moda, aventurouse a crear a nova marca que acaba de nacer. A mediados de marzo estreou Roade, a firma de téxtil que leva o seu apelido e as súas conviccións. «Son pezas que levan o meu sinal no nome e no estilo», explica sobre un selo cuxos puntos fortes son a alta calidade duns modelos que fabrican usando só material ecolóxico certificado e un deseño atemporal que se desligue de tendencias do momento. «Inspírome en elementos vintage icónicos», explica relatando como o que foi o xerme da súa primeira colección: «Naceu como unha recreación dun top de perlé que fixo a miña tía hai case 50 anos, que máis tarde pasou a ser da miña nai e logo herdeino eu e incorpóreo ao meu armario», conta sobre unha camiseta de asas que leva un calado na parte superior que lembra a unha rede de pesca e orixinou todo o imaxinario de Mareira, título da súa primeira liña, bautizando cada peza con nomes mariñeiros como arnela, dorna, ronsel e outros. «É unha homenaxe á cultura mariñeira galega e unha volta ás miñas orixes, ao pobo mariñeiro onde me críe porque quería que reflectise a miña procedencia», recoñece a creadora de Roade , unha marca da que se enche de orgullo tamén porque «producimos integramente dentro de Galicia, en pequenas tiradas». Por agora as súas creacións atópasen na tenda online e no market place de Fieito, «pero estamos abertos a expandirnos, talvez non empezando por montar tenda física propia, pero si empezando a ter presenza noutras en Galicia, no resto de país e en Europa, sempre que estean aliñados coa nosa filosofía de marca», insiste.
Marcas emerxentes
As feiras e eventos forman parte tamén da súa idea de futuro, con ganas de atoparse con outros creadores de moda sostible, marcas emerxentes, artesanía de fabricación galega en espazos para compartir unha visión con xente que trata de saír adiante con proxectos dunhas características concretas similares ás nosas», indica a deseñadora que por agora, empezou cunha colección de pezas de muller, «pero gustaríame engadir complementos e roupa de home», afirma sobre un traballo no que atopou unha nova paixón. «O deseño é agora co que máis gozo», engade. A tarefa implica, ademais, a selección de materiais ecolóxicos certificados, que, como explica a deseñadora galega, «non só se trata de que o tecido sexa ecolóxico senón que hai que ver como foi producido».
Para María Roade, as pezas deberían ter unha vida máis longa da que actualmente ten a moda de usar e tirar. «Que teñan historia e convértanse en obxectos valioso paréceme algo precioso polo que merece a pena esforzarse», que no seu caso se resumen na súa paixón por transformar o concepto de moda vintage en Galicia cunha clara visión ecolóxica.
María Roade embarcouse no sector da sustentabilidade creando a cooperativa Fieito e a creación de Roade convive en paralelo. A baionesa trasladouse á Coruña mentres traballaba en mercadotecnia por unha oportunidade laboral e actualmente reside non moi lonxe dese núcleo urbano, en Cerceda. O que máis lle gusta sobre a súa marca é que todo o que fabrica faise nun radio de 50 quilómetros: «Colaboradores, talleres, todo está aquí. Somos a antítese, o David ao lado de moitos Goliat, pero énchenos de orgullo apoiar a economía local e os oficios tradicionais no sector téxtil, o que che permite un control sobre a ética, na calidade do que produces e reduces a pegada ecolóxica.