O Tribunal Superior libra ao Concello de Vigo de pagar 1,5 millóns polo concerto de Guns N´Roses

O Tribunal Superior de Xustiza de Galicia (TSXG) deu a razón ao Concello de Vigo e revogou a sentenza que lle obrigaba a pagar 1.563.000 euros, máis IVE e intereses, á promotora Sweet Nocturna polo concerto de Guns N'Roses celebrado en Balaídos en xuño de 2023. A Sala do Contencioso-administrativo estima así o recurso interposto polo Concello e declara conforme a dereito o acordo municipal que declarou deserto o procedemento de licitación.

O tribunal considera que a exclusión da promotora foi unha decisión «motivada, non arbitraria» e «axustada aos pregos» do concurso, aos que a empresa se someteu ao presentar a súa oferta. A resolución lembra que a tramitación «non pasou da apertura do sobre A» e que a Mesa de Contratación concluíu que Sweet Nocturna «non demostrara capacidade para licitar» ao incumprir os requisitos esixidos.

Os maxistrados subliñan que, ao quedar excluída a única ofertante, «a única declaración posible que lle quedaba á Administración era a de declarar deserto o expediente». Engaden que a promotora, se tiña dúbidas sobre os pregos ou o procedemento, podía solicitar aclaracións ou impugnado as bases, pero non o fixo, «deixando que os pregos gañasen firmeza».

O TSXG admite que puido existir «descoordinación» no Concello durante a tramitación, pero recalca que a empresa aceptou sen reservas os pregos e que «os tratos previos non vinculan á Administración en materia de contratación pública». Por iso, a promotora «non pode invocar a vulneración dos principios de boa fe, seguridade xurídica ou confianza lexítima», xa que estes esixen «unha boa fe propia», algo que —segundo o tribunal— non se aprecia na súa actuación.

O fallo tamén valida o acordo municipal de agosto de 2023 polo que se rexeitou o pago reclamado pola promotora ante a «inexistencia de contrato». A sentenza do TSXG non é firme e pode ser recorrida en casación ante o Tribunal Supremo.

---

---

---