Ao conxunto dirixido por Juan Copa quedan tres partidos de liga, dúas deles en Riazor, para rematar o ano 2025
28 nov 2025 . Actualizado á 18:14 h.Tras unha semana de parón pola xornada da segunda competición europea, regresa a acción na OK Liga de hóckey sobre patíns. O Liceo recibe este sábado (19 horas, OK Liga TV) no Palacio dos Deportes de Riazor ao Voltregà, quinto clasificado da máxima categoría do hóckey sobre patíns nacional.
O conxunto verdibranco chega ao encontro tras plantar cara ao campión de Europa. Os coruñeses adiantáronse, pero o Barcelos igualou ao fío do descanso e completou a remontada no tramo final.
Na competición doméstica, os de Juan Copa están a realizar unha gran campaña, con só unha derrota en nove encontros, ademais de dous empates. Estes resultados sérvenlle para ser terceiros, a dous puntos dos líderes, o Igualada e o Barcelona.
O Liceo encara esta tarde o primeiro dos catro partidos que lle quedan neste 2025. Ademais do Voltregà, ten que recibir ao Lleida e ao Sporting —na Champions— e visita o pavillón do Caldes. O calendario é favorable aos coruñeses, principalmente pola escaseza de desprazamentos.
Eliminación en Europa
En fronte estará un Voltregà que vén de sufrir un duro pau na WSE Cup, a segunda competición a nivel europeo. O conxunto local derrotara ao Monza 1-3 na ida dos dezaseisavos de final, pero unha mala segunda parte na volta condenou ao equipo español á eliminación (0-3). O seu rendemento en liga é completamente diferente, levan un mes sen coñecer a derrota e empataron ao todopoderoso Barcelona.
Dependendo dos resultados da xornada, un triunfo do Liceo podería certificar matematicamente a súa presenza na próxima edición da Copa do Rey. De momento, ten unha marxe de 8 puntos con respecto ao sétimo clasificado (o Noia, anfitrión, é noveno e entraría no canto do oitavo) e quedan 12 puntos en xogo.
O encontro entre o Liceo e o Voltregà servirá tamén para impulsar unha iniciativa de doazón de alimentos xunto á Cociña Económica.