Riazor mide o primeiro asalto entre o Liceo e o Barcelos nos cuartos de final da WSE Champions League
TORRE DE MARATHÓN
Os de Juan Copa intentarán lograr no Palacio dos Deportes un resultado positivo para afrontar a volta en Portugal
26 mar 2025 . Actualizado á 18:06 h.Chegou o día que todos os afeccionados ao hóckey sobre patíns na Coruña estaban a agardar. Este xoves (20.30 horas, TVG 2) o Palacio dos Deportes de Riazor acollerá a ida dos cuartos de final da WSE Champions League, que enfronta ao Deportivo Liceo e ao Barcelos portugués.
O conxunto coruñés, por historia un dos mellores de todo o continente, regresa sete tempadas despois aos cuartos de final da competición europea, tras caer ante o Reus na edición do 2018. Os colexiais chegan a este encontro tras quedar na cuarta posición nun grupo co Benfica, o Oliveirense, o Trissino, o Valongo e o Quevert. Os de Juan Copa sumaron catro vitorias, tres empates e tres derrotas na fase de grupos.
En fronte estará o Barcelos, un dos equipos favoritos a conquistar esta edición da Champions. Os portugueses chegan a este tramo da competición europea invictos e conservan o núcleo duro de xogadores co que acadaron as semifinais da liga de Campións a tempada pasada. O seu principal perigo será o luso Miguel Rocha, máximo anotador da competición con 14 dianas.
Os últimos precedentes entre ambos os equipos foron na fase de grupos da tempada pasada, cun balance dunha vitoria do Barcelos en Riazor (2-4) e un empate en Portugal (4-4).
«Creo que chegamos ben, levamos tres vitorias consecutivas. Recibimos a un grande equipo como Barcelos. Eles dominaron moi ben o outro grupo sendo primeiros, pero seguro que imos competir moi ben a eliminatoria. Queremos sacar un resultado positivo para logo ir á volta a Barcelos, que será onde se decida a eliminatoria», afirmou Juan Copa, técnico liceísta.