MJ Pérez estrea «Tanto por Loitar» para alentar ao Dépor Abanca en busca do ascenso
TORRE DE MARATHÓN
![MJ Pérez estrena su canción Tanto por Loitar, inspirado en el Dépor Abanca](https://img.lavdg.com/sc/jF6mBGiqGjL6-JnC4YKAd3DzlTo=/480x/2024/04/18/00121713456003420385131/Foto/j_20240418_175227000.jpg)
A cantautora arzuá estivo vinculada ao mundo do fútbol desde a infancia e é deportivista desde sempre
19 abr 2024 . Actualizado á 16:35 h.MJ Pérez, cantautora arzuá, estreou este venres 19 de abril o seu tema «Tanto por loitar», unha canción inspirada no Dépor Abanca pero que fala de todas aquelas que fixeron camiño antes e das que non xogan, pero seguen dando alento ás novas xeracións.
A arzuá compuxo este tema xa hai un tempo, no 2019, cando o Dépor Abanca arrasou en Primeira División a todos, pero non foi ata o de agora cando puido pasar por un estudo para poder producilo. O título da canción ten un significado especial porque resume a situación actual do fútbol feminino, xa que a pesar de estar nun momento no que se avanzou moito, aínda queda moito por facer.
MJ Pérez, debido ao posible ascenso do equipo coruñés á liga F, quixo apurar a produción desta canción para chegar a tempo antes do final de tempada e dar un último empuxón para animar a todas as xogadoras. «Pase o que pase o domingo, non estarán soas, como nunca o estiveron ao longo da tempada e ao longo destes anos», sinala a cantautora.
Para ela os tres piares fundamentais para apostar por esta canción son o apoio, a visibilidade e o exemplo. Ante todo, apoiar o equipo. En segundo lugar, pór o seu gran de area á visibilidade do fútbol feminino en xeral e do Dépor Abanca en particular. En último lugar, por ser exemplo dos valores do deporte e do deportivismo e porque representan a moitas que estiveron e son un referente para aquelas que virán.
Unha cantautora un tanto seareira
MJ Pérez, ademais de cantautora, descubriu desde os cinco anos que unha das súas paixóns era o fútbol. Gran parte da súa infancia pasouna xogando en equipos de mozos porque non tiña outra opción e non foi ata 2018 cando MJ formou parte durante dúas tempadas no Arzúa FCF.
A propia artista admite que non sabe moi ben como puido compatibilizar o fútbol coa súa actividade musical, xa que foi capaz de xogar, dar concertos e incluso preparar un novo disco.