A Coruña lidera as vendas do cerco en Galicia tras poxar 622 toneladas en catro días
PESCA E MARISQUEO
Desde xaneiro comercializou máis de 7.328 toneladas de sardiña, bocarte, xurelo e boga
25 ago 2025 . Actualizado á 04:50 h.Durante a semana recentemente acabada, a lonxa da Coruña poxou 622 toneladas de sardiña, bocarte, xurelo e boga, as principais fontes de ingresos dos cerqueiros. Este balance dos últimos días confirma unha tendencia sostida que reforza á rula coruñesa como a líder galega en vendas das capturas desa flota.
Desde xaneiro, supera as 7.328 toneladas desas catro especies, que representan un 33% das 22.388 comercializadas en toda a comunidade autónoma. No 2024 por estas datas, A Coruña distribuíra 5.306 toneladas, un 29% das de toda Galicia. Distánciase de Ribeira, que segundo os datos oficiais de PescadeGalicia suma 4.605 toneladas de sardiña, bocarte, xurelo e boga no que vai de ano, un 20% do total autonómico, cando por estas datas do 2024 distribuíra o 23%.
Da semana pasada na Coruña, sobresaen 401 toneladas de bocarte, 130 de xurelo e 72 de sardiña. Desta última, ata o de agora vendeu 2.845 toneladas, pouco menos que as 2.892 poxadas en Ribeira. A lonxa coruñesa supera ás demais galegas en bocarte (1.905 toneladas), xurelo (2.399) e boga (180). Coas catro facturou 7,2 millóns de euros, segundo as cifras de PescadeGalicia.