Os científicos aconsellan outro recorte da cota de abadexo que paralizaría barcos antes de setembro
PESCA E MARISQUEO
Con 703 toneladas por ano, «provocará o peche prematuro das pesqueiras para as flotas españolas»
11 ago 2025 . Actualizado á 04:50 h.Científicos do Consello Internacional para a Exploración do Mar (ICES, polas súas siglas en inglés), órgano asesor da Comisión Europea, conclúen que o abadexo na costa atlántica de Brest (Francia) a Tarifa (Cádiz) «está por baixo do límite de protección da biomasa». Por iso propoñen outro recorte de capturas do 21%, aconsellando que non se pesquen máis de 703 toneladas en cada un dos dous próximos anos. Ante esa recomendación, a Comisión encargou un informe a outro dos seus asesores, o Comité Científico, Técnico e Económico da Pesca (STEFC), explorando opcións como o posible final da pesqueira antes de setembro, cando acostuma capturalo a flota galega e do noroeste.
O abadexo é unha especie accesoria nas pesqueiras mixtas da baixura, o palangre ou o volante, que non poden evitar que caia nos seus aparellos. Teñen prohibido ir a por este peixe aposta, pero flotas de distintos caladoiros venderon no que vai do 2025 en lonxas galegas unhas 146 toneladas, a medias de 7,28 euros o quilo.
A redución das posibilidades de pesca que recomendan agora os científicos estivo precedida no 2024 por un severo tajazo do 53%. Inicialmente, a Comisión seguiu ao pé da letra ese consello do ICES, pero a mediados do 2024 o Ministerio de Agricultura, Pesca e Alimentación remitiulle á Comisión informes do grave impacto socioeconómico en pesqueiros de Galicia e do resto do Cantábrico.
Bruxelas solicitou unha análise ao STEFC, que entón concluíu que con tan exigua cota abocaría ao amarre a barcos con cotas doutras especies, prexudicándoos. Subindo a talla mínima a 42 centímetros, en outubro a Comisión elevou a cota en augas ibéricas a 225 toneladas, 97 da desembocadura do Bidasoa a Fisterra e, de aí a Cádiz, 128.
«Provocará o peche prematuro»
A pedimento da Comisión, o STEFC avalía tres posibles escenarios. O recorte que expoñen os científicos «provocará o peche prematuro das pesqueiras en setembro para as flotas españolas» no litoral ibérico, para as francesas nas súas augas atlánticas e, segundo este asesor do Executivo comunitarios, «é probable que as flotas portuguesas non se vexan afectadas».
Para que o esgotamento da cota de abadexo non obrigue a amarrar a pescadores que poderían seguir capturando outras especies e, por tanto, para darlles opción a faenar todo o ano, o STEFC calcula que o tope de capturas debería ser de «1.146 toneladas», aínda que segundo as súas propias cifras serían 1.156: 834 para augas francesas, 148 entre o Bidasoa e Fisterra e 174 de aí ao sur.
E no caso de que as «pesqueiras permanecesen abertas ata setembro», estima que deberían ser 881 toneladas: 687 para augas francesas, 86 para o tramo de Francia a Fisterra e 108 para o que chega a Cádiz.
Dito iso, alegando «falta de información pesqueira actualizada» sobre as capturas do ano pasado, o STEFC sostén que «non se pode dar un asesoramento fiable» sobre as capturas accidentais de abadexo para evitar peches prematuros, «nin avaliar os impactos socioeconómicos dos peches». Aínda así, «non pode recomendar un nivel de captura de abadexo superior ao máximo» aconsellado polo ICES. Ademais, conclúe que «existen outros mecanismos» na política pesqueira comunitaria «que poderían mitigar ou eliminar» o previsible amarre forzoso da flota.