Aplausos ao laudo que permite á flota europea pescar lanzón en augas británicas
PESCA E MARISQUEO
«Sincero agradecemento» de Europêche á Comisión e á Eurocámara
13 may 2025 . Actualizado á 04:46 h.«Agardamos que achande o camiño para que os pescadores da UE recuperasen o acceso ás augas do Reino Unido e continúen capturando de xeito sostible a vital cota de lanzón», declara Kenn Skau, membro da directiva da patronal comunitaria Europêche. Desde esa organización aplauden o laudo da Corte de Arbitraxe dA Haia que considera que o Goberno de Londres incumpriu « a súa obrigación de conceder pleno acceso» a caladoiros ingleses do Mar do Norte e de Esocia, e ordénalle tomar as «medidas necesarias» para cumprir con este fallo.
Desde Europêche lembran que a interpretación de Arbitraxe «reforza a importancia de medidas de conservación equilibradas e baseadas na evidencia, así como a necesidade de acordos de acceso para ambas as partes» como os que establece o Acordo de Comercio e Cooperación postbrexit. No mesmo comunicado expresan o seu «sincero agradecemento á Comisión Europea e aos membros do Parlamento Europeo pola súa dedicación e arduo traballo na defensa dos intereses da UE neste caso».
«Esta sentenza resalta o valor da xestión pesqueira proporcionada e baseada na ciencia, e subliña a importancia de manter os compromisos internacionais», engade Skau. Incide en que a pesqueira do lanzón «xestiónase estritamente de acordo co asesoramento científico do Consello Internacional para a Exploración do Mar (CIEM), que é recoñecido mundialmente polas súas avaliacións de stock sólidas e baseadas na evidencia». E expresa confianza en «colaborar de forma construtiva co Reino Unido para restablecer o acceso e garantir a xestión eficaz e sostible dos nosos recursos mariños compartidos»
Case o 97% das cotas de lanzón (Ammodytes spp), pescado que en Galicia coñécese como birlo, bogón, pión ou furón, en augas do Reino Unido (Mar do Norte e Escocia) estaban asignadas o ano pasado á flota da UE e o 3% á británica. Pesqueira certificada como sostible desde o 2017 por MSC (Marine Steward Ship Council), o Goberno de Londres decidiu pechala desde abril do ano pasado de modo «unilateral, sen consulta ou acordo previo». A Asociación Europea de Organizacións de Produtores de Peixe (EAPO, polas súas siglas en inglés) e a Asociación de Produtores Europeos de Fariña e Aceite de Peixe (EFFOP) apelaron á Comisión Europea, que primeiro intentou resolvelo chamando a consultas ao Executivo británico, pero ao non logralo recorreu á Corte de Arbitraxe dA Haia.