Galicia subvencionará 30 dos 80 millóns que prevé investir unha firma norueguesa para criar salmón en Burela
ACUICULTURA
Directivos de Seafood Legacy confírmanlle en Oslo á conselleira María Jesús Lorenzana que as obras empezarán a final de ano
07 jun 2025 . Actualizado á 11:10 h.Ata principios deste século resistiu na ría de Ortigueira o primeiro intento de criar salmón en Galicia, iniciado a mediados dos setenta en tanques en terra e en gaiolas no mar. Agora, cinco anos despois de que transcendese por primeira vez o proxecto Salmon technology plant in the port of Burela, directivos da empresa norueguesa Seafood Legacy confirmáronlle a María Jesús Lorenzana, conselleira de Economía e Industria, a intención de iniciar a finais deste ano as obras da planta onde cultivarán salmón nesa localidade da Mariña lucense.
Economía cifran o investimento en 80 millóns de euros, dos cales a Xunta «previsiblemente» achegará «uns 30», explica nun comunicado. De viaxe oficial na capital nórdica, onde se celebra a feira Nor-Shipping de Oslo, «unha das máis relevantes a nivel internacional do sector naval e o transporte marítimo», Lorenzana reuniuse con directivos de Seafood Legacy. Segundo a consellería, lle «confirmaron» informacións xa avanzadas, «que a finais de ano comezarán as obras» da granxa galega.
Tamén ratifica que a planta «xa conta con todos os permisos para ocupar en torno a 20.000 metros cadrados no porto de Burela». Aí construirá «unha nave na que prevé producir unhas 3.300 toneladas de salmón ao ano», do que cabe deducir que o cultivará en tanques. «Estimase que creará ata un cento de postos de traballo directos e indirectos», engade a consellería.
Atrás queda un proceso administrativo iniciado a finais do 2020, cando Seafood Legacy Spain solicitou terreos a Portos, que no 2023, tras rebater o informe negativo emitido por Costas do Estado no 2022, outorgoulle unha concesión por 50 anos. Desde principios do 2023 ten licenza da Consellería do Mar e o Concello de Burela concedeulle a de construción.
En xaneiro, cando ampliou o seu capital social de 4,7 a 10 millóns de euros, a empresa presidíaa Jonny-Atle Maruy, o vicepresidente era Anders Hagen e o secretario Fernando Arias, todos eles conselleiros, xunto a Ivar Refsnes e Xoán Antón Regal.
«É unha moi boa nova pola que se agardaba en Burela e para nós un verdadeiro motivo de satisfacción porque se trata dun proxecto industrial máis que se instala en Galicia, que confía e aposta por Galicia», declarou Lorenzana.