Os bonos poderán descargarse o próximo 28 de xullo en bonopeixe.gal
07 jul 2025 . Actualizado á 16:14 h.O Executivo galego deu este luns luz verde ao programa Bono Peixe, un modelo similar ao implementado xa no comercio, e co que darán 50 euros ás cidadáns, que poderán utilizar en descontos semanais de cinco euros para a compra de peixe e marisco. Unha medida que ten por obxectivo contrarrestar a caída do consumo nun alimento indispensable para unha dieta sa. A orde que senta as bases para a adhesión e activación do programa farase pública este xoves no Diario Oficial de Galicia (DOG). A partir do día seguinte, poderán solicitar a súa participación no programa os comercios que cumpran os seguintes requisitos: desenvolver a actividade comercial en Galicia; reunir as condicións legais para o seu exercicio; ser empresarios autónomos ou establecementos autorizados; estar dados de alta en ningúns das epígrafes do IAE recolleitos na orde; e, para rematar, estar dados de alta no Rexistro Sanitario de Galicia.
Tal e como explicou a Xunta, os bonos estarán dispoñibles a partir do 28 de xullo na plataforma bonopeixe.gal e poderá descargarse unha aplicación específica para o móbil. Como funciona o programa? O primeiro requisito do beneficiario é que sexa maior de idade. Cada bono que poida descargarse un usuario terá un valor de 50 euros, repartidos en dez tramos semanais nos que se aplicará un desconto de cinco. A iniciativa non esixirá un importe mínimo de compra. O saldo que non se consuma poderá acumularse para as seguintes semanas, pero non poderá haber un desconto superior a 25 euros cando se faga unha compra de peixe. A Administración galega liberará para o programa uns 250.000 euros por semana.
O presuposto total do programa impulsado pola Xunta ascende a 2,5 millóns de euros e trátase dunha iniciativa impulsada ao amparo do Fondo Europeo Marítimo de Pesca e Acuicultura (Fempa). As estimacións elaboradas pola Consellería do Mar apuntan a que o Bono Peixe, en conxunto, xerará un impacto económico de polo menos dez millóns de euros grazas ao impulso do consumo e o reforzo que suporá para o conxunto da cadea de produción e comercialización.
Tal e como explicaron Alfonso Rueda e a conselleira do Mar, Marta Villaverde, o programa actúa sobre catro eixos: favorecer a soberanía alimentaria; mellorar o benestar da cidadanía; concienciar ao conxunto da sociedade; e, para rematar, pór en valor a despensa galega.
En concreto, Marta Villaverde explicou que con este bono preténdese «estimular o consumo de peixe e marisco e mellorar a dieta dos consumidores». Tras a intervención do presidente Rueda, a conselleira precisou que «é unha medida innovadora que responde aos cambios nos hábitos alimentarios dos últimos tempos e á necesidade de apoiar a un sector estratéxico para Galicia».
O propio Alfonso Rueda xa anunciou en sede parlamentaria esta iniciativa o pasado mes de abril e entón sostivo que se trataba dunha medida «simbólica» que permitiría a 50.000 galegos aforrar ao redor dun 25% na compra de peixes e mariscos. Ao programa para incentivar o consumo de peixe e marisco poderán adherirse uns 1.600 establecementos na comunidade galega.