Pontevedra, un laboratorio ao aire libre para entender como funciona unha ría

Un estudo por terra, mar e aire. Os científicos e técnicos dos proxectos Marisdrone, Marislab e Envirosub realizaron esta semana unha toma masiva de datos nos bancos marisqueiros do fondo da ría de Pontevedra co obxectivo de aproveitar o bo tempo e unhas mareas adecuadas para a recompilación de información destas iniciativas destinadas a dar coas claves obxectivas que permitan mellorar a explotación dos bancos de ameixa e berberecho. Pontevedra é a ría de estudo, pero a execución destes proxectos, cuxas primeiras conclusións relevantes agardan para finais do próximo ano, dotarán á comunidade científica galega dos elementos necesarios para facer o mesmo nas demais rías.

Estas iniciativas levan a cabo coa colaboración da federación provincial de confrarías, así como dos depósitos de Lourizán, Raxó e San Telmo, e a Universidade de Vigo. Son programas multidisciplinares e de varios anos de duración, que irán realizando unha fotografía detallada de que pasa na ría de Pontevedra en cada estación.

Marislab é un proxecto impulsado polo Instituto de Investigacións Mariñas de Vigo (IIM), vinculado ao CSIC, co respaldo da Consellería do Mar. O conselleiro, Alfonso Villares, e o vicepresidente do CSIC, Carlos Closa, asinaron o acordo de colaboración, que permitirá «o estudo integral das condicións sedimentarias óptimas» para ameixas e berberechos. Buscarse «coñecer a porción máis axeitada entre area e lodo en sedimentos, así como os factores bioquímios que favorecen a presenza e crecementos de bivalvos». En cada mostra mídense numerosos factores físicos oceanográficos relacionados, por exemplo, coas mareas, así como «as propiedades texturais e bioxeoquímicas dos sedimentos» e como todos estes aspectos inflúen na abundancia ou escaseza do marisco. É unha proposta na que tamén participa o Centro de Investigacións Mariñas de Vigo (CIMA) e rexistrada en Redemar.

As tomas de mostras de Marislab, ao igual do outro proxecto denominado Envirosub —este último unha iniciativa da Axencia Española de Inestigación e con equipo técnico do IIM-CSIC de Vigo— realízanse con aparellos moi complexos que analizan cada variante e recollen mostras desde a praia en marea baixa, así como no medio da ría co barco da lonxa de Campelo. Envirosub analiza a biogeoquímica dos bancos marisqueiros e o impacto das augas subterráneas que descargan nos bancos e o seu efecto no marisco.

O terceiro proxecto e que máis curiosidade esperta entre os curiosos, pola vistosidade da súa toma de datos, é Madrisdrone, co asesoramento de Telespazio e que empregando drons crea imaxes térmicas e multiespectrales das praias, as súas augas subterráneas e o cambio dos perfís das praias en cada estación.

---

---

---