Incéndiase un pesqueiro en Muros e evacúan ao hospital aos seus dous tripulantes, un deles con queimaduras leves

O pesqueiro de artes menores Novo Mariña incendiouse esta madrugada de mércores cando se atopaba a tres millas de monte Louro en Muros. Os seus dous tripulantes, uns irmáns de Fisterra, foron rescatados e trasladados ao hospital comarcal de Barbanza. Segundo informa o 112, que tivo constancia deste incidente ás 6:15 horas, un dos pescadores sufriu queimaduras de carácter leve na cara e nun brazo. 

Foi outra embarcación que faenaba na zona, A Chainza, a que rescatou ás dúas tripulantes, que a continuación foron recollidas pola Salvamar Regulus, de Salvamento Marítimo. Esta embarcación de rescate levou aos feridos ata Porto do Son, desde onde os trasladaron en ambulancia ao hospital comarcal.

No operativo participaron Urxencias Sanitarias de Galicia-061, Salvamento Marítimo, o Servizo de Gardacostas de Galicia e os axentes da Garda Civil. O buque Mar de Galicia realizou labores de extinción, aínda que finalmente o Novo Mariña afundiu.

O incidente provocou unha gran mancha de hidrocarburos que, indican desde a Consellería do Mar, está fronte á praia de Lariño. Esta circunstancia obrigou á Xunta a activar, en nivel 2, o plan Camgal anticontaminación. O conselleiro do Mar, Alfonso Villares, notificoullo ao delegado do Gobierno en Galicia, Pedro Blanco. Na comunicación tamén se solicitaba a activación do Plan Marítimo Nacional, que se puxo en marcha posteriormente en fase de alerta. 

Gardacostas de Galicia traballa na zona coa patrulleira María de Pazos, da base operativa de Portosín, e permanece tamén no lugar co Mar de Galicia, que realiza labores de dispersión mecánica. Desde o servizo autonómico solicitouse a poñer# ao dispor de todos os medios dispoñibles na zona por parte de Salvamento Marítimo para evitar que a mancha chegue aos areais máis próximos. A Salvamar Régulus tamén se atopa no lugar.

---

---