Arousa norte concentra ao 80 % das traballadoras da conserva da provincia

Dimensionar adecuadamente o papel da muller no mar para, a partir de aí, impulsar medidas e políticas públicas para promover a igualdade de xénero nas actividades profesionais vinculadas ao sector é o obxectivo co que a Deputación da Coruña desenvolveu en colaboración coa Asociación Nacional de Mulleres da Pesca (Anmupesca) un mapa sobre a presenza feminina e este ámbito. As conclusións do informe elaborado a partir dese mapeo dan boa conta do peso específico que teñen para Barbanza as actividades vinculadas ao mar. Un exemplo está claro na industria, xa que Arousa norte concentra ao 80 % das traballadoras da conserva da provincia.

O estudo analiza diferentes actividades vinculadas ao mar, desde o marisqueo á transformación de produtos pesqueiros e marisqueiros, a comercialización e as redeiras. No que respecta á fabricación de conservas, Barbanza é un territorio de referencia no sector, con Ribeira, A Pobra e Boiro á cabeza en canto a emprego. Trátase dun ámbito de traballo moi feminizado, como demostra a elevada porcentaxe de mulleres dedicadas a esta actividade. Na comarca, a man de obra feminina representa o 70 % do total.

Similares son as porcentaxes na industria do procesado de peixe, crustáceos e moluscos, que engloba a elaboración de produtos conxelados, ultracongelados e refrigerados e que tamén é fundamental nas zonas costeiras da provincia. Neste ámbito, tamén sobresae Arousa norte, con Boiro e Ribeira como os municipios que contan con maior número de mulleres empregadas nesta actividade. A situación na comarca do porto ribeirense, un dos principais do territorio autonómico, favorece a importante implantación deste sector en Barbanza.

Tamén é unha profesión fortemente feminizada o marisqueo do montón, un ámbito no que sobresae Noia, que ten un peso específico nesta actividade a nivel global. Con 492 produtoras tanto do montón como de á boia, o noiés é o municipio con maior presencia de mulleres nesta actividade. Delas, 206 traballan en embarcación, e representan o 64 % do total de mariscadoras á boia da provincia.

A máis grande

A de Noia esta tamén a confraría máis importante de Galicia en cando a número de socios, 1.346 persoas en total, das que 492, o 36,7 %, son mulleres.

O peso específico que ten o mar na área de Barbanza queda reflectido na importancia das súas entidades mariñeiras. Non en balde, Rianxo é a segunda do ránking, con 518 socios, 162 delas mulleres, o que supón un terzo do total; seguida de Ribeira (355) e Cabo de Cruz. O informe da Deputación destaca tamén o feito de que, coa excepción de Ribeira, estas son as confrarías que concentran un maior número de profesionais femininas asociadas, precisamente, debido á súa especialización no marisqueo a pé.

Santa Uxía, segundo porto en importancia

A comercialización é un dos puntos finais da cadea de valor da pesca, e neste ámbito sobresae Ribeira debido ao peso do seu porto. É o segundo en importancia, por detrás do da Coruña, pola concentración de profesionais do comercio almacenista, con 270 persoas, das que 91 son mulleres, o 33,7 %. No conxunto da comarca hai 466 traballadores dedicados a esta función, e 178 son mulleres.

As rianxeiras sobresaen na pesca de baixura

Así como no mar hai oficios feminizados, a pesca de baixura mediante artes menores é un ámbito de actividade masculinizado, e no conxunto da provincia coruñesa hai apenas 123 mulleres dedicadas a esta profesión. Destaca polas súas cifras o caso de Rianxo, onde son 59 as traballadoras de artes menores. Supoñen o 48 % do total da Coruña, e o 24,6 % do total de pescadores asociados á confraría rianxeira.

Ribeira, Boiro e A Pobra lideran a presenza feminina

As actividades vinculadas ao mar teñen unha importancia esencial na comarca, e dentro delas o peso das mulleres é fundamental, como demostra o feito de que Ribeira, Boiro e A Pobra son os concellos da provincia con maior número de traballadoras nos diferentes sectores, 1.251, 1.242 e 1.047 respectivamente. No caso pobrense, as mulleres representan o 63 % da poboación pesqueira, e en Boiro son o 57,4 %.

---

---